Titelaktes in Dysselsdorp oorhandig
Provinsiale minister van infrastruktuur, Tertuis Simmers, het verlede Donderdag titelaktes aan begunstigdes met gestremdhede in Dysselsdorp oorhandig.
Luidens Simmers se woordvoerder, Ntobeko Mbingeleli, het Simmers en Chris Macpherson, burgemeester van die Oudtshoorn-munisipaliteit, die begunstigdes besoek en hul titelaktes oorhandig.
"Die titelaktes kom na nege maande na sommige van hierdie begunstigdes die eerste keer hul huise in Julie 2023 ontvang het. Die sekuriteit van verblyfreg is een van die Wes-Kaapse Regering (WKR) se prioriteite in die herstel van die inwoners se waardigheid. Die sooi vir die Dysselsdorp-behuisingsprojek is in Oktober 2021 gespit en die projek het 459 huise suksesvol opgelewer."
Volgens Mbingeleli het 'n vrou, wie se seun 'n dubbele amputasie gehad het, haar dankbaarheid teenoor die WKR uitgespreek. "Ek is ewig dankbaar vir die behuisingsgeleentheid wat die provinsiale regering ons gegee het. Hierdie huis het ons lewens geweldig verbeter. Noudat ons ons titelakte ontvang het, is my seun se toekoms verseker."
Simmers het gesê dat die oorhandiging van titelaktes aan begunstigdes met gestremdhede in Dysselsdorp 'n belangrike mylpaal is om die regering se verbintenis om huiseienaarskap te verseker en mense se waardigheid te herstel.
"Die voltooiing van hierdie reis beklemtoon ons toewyding om behuisings-ontwikkelings te versnel
en die verblyf-sekerheid vir alle inwoners te verseker. Ons bly onwrikbaar in ons missie om gemeenskappe te bemagtig deur toeganklike en volhoubare behuisingsgeleenthede."