Janien se werk pronk in Italië
Janien Müller (16), Oudtshoorn se jong, nederige kunstenaar, se inskrywings vir Picture This! 2023 word tans saam met al die ander illustreerders se werk in Italië ten toon gestel.
Sy is verlede jaar as een van drie Suid-Afrikaanse kunstenaars gekies is wat 'n internasionale kunskompetisie gewen het. Sy was algeheel die jongste wenner en ook die enigste in die Wes-Kaap. Protea Boekhuis, het tesame met etlike internasionale boekuitgewers die kompetisie vir illustreerders om karakters te skep, van stapel gestuur.
Die uitstalling word in Bologna gehou en haar sketse vorm deel van die grootste kinderboekuitstallings te wêreld waar meer as 100 verskillende lande se uitstallings gevind kan word.
Janien sê Picture This! (2023) was ’n groot nuwe uitdaging.
"Ek het op die stadium toe ek ingeskryf het nie besef dis so ’n groot kompetisie waaraan professionele illustreerders sou deelneem nie. Ek is mal daaroor om nuwe karakters te skep, ek was eintlik net besig om te eksperimenteer met karakters en tonele. Ek is baie opgewonde, maar ek moet ook eerlik sê dat dit baie onwerklik voel. Ek wens ek kon die Bologna Kinderboekebeurs hierdie jaar in Italië bywoon. Ek glo illustreerders kan baie daar leer."
Janien sê hierdie jaar gaan 'n opwindende jaar wees en het sy nog baie wat sy wil aanpak. "Ek wil graag my tegnieke in kinderboekillustrasies verbeter en ontwikkel. Daar is opwindende projekte in die pyplyn vir 2024, waaronder ‘n kinderboek of twee se illustrasies. Ek hou van nuwe uitdagings, en is mal oor lees en musiek luister. Ek kyk graag "animated series" vir die animasie en storielyn. Ek is mal oor kleure ... my kop is gevul met stories en prentjies," vertel sy opgewonde.
Sy sê egter dat haar akademie vir haar baie belangrik is, so die grootste gedeelte van haar tyd bestee sy daaraan.