Nuwe lewe vir Martha Hofmeyr
Demensie is ‘n gevreesde siekte wat gewoonlik in die later jare by
‘n persoon gediagnoseer word – ‘n toestand wat die geheue, aandag, taalen probleemoplossingsvermoë aantas. Sommige demensielyers kan steeds gesprekke voer, terwyl ander in hulle gedagtes verdwaal raak.
Die natuur het dikwels die manier om ‘n mens rustig te maak, en by die SAVF Martha Hofmeyr is daar ‘n saal spesiaal vir demensielyers ingerig.
In 2018 het die Toyota Knights ‘n tonnel langs die demensiesaal opgerig met groente.
Die instandhouding van die tonnel het egter mettertyd agteruitgegaan, maar in Februarie vanjaar het die bestuur besluit om dit weer op te knap.
“Daar is ‘n deur vanuit die demensiesaal waardeur die pasiënte kan beweeg na die tuin waar die tonnel geleë is toe. Hulle hou daarvan om buite te wees. Daar is ook ‘n hek wat gesluit word sodat die pasiënte nie kan wegraak nie,” vertel Marietjie Smit, die waarnemende bestuurder by die SAVF.
‘n Paar maande later het twee leerders van Oosskool, wat finaliste in die Mnr. en Mej. Oos-kompetisie was, Tyron Engelbrecht en Beandri Redelinghuys, Marietjie genader en gevra hoe hulle van hulp kan wees.
Marietjie het vir hulle gesê van die plan om die tonnel weer in ‘n werkende toestand te kry, en die twee, saam met hulle ouers, het aan die werk gespring.
“Hulle het die tuin rondom die tonnel skoongemaak en nuwe plante aangeskaf. Daar is plaveisel gelê sodat die rolstoele makliker kan beweeg en selfs bankies op strategiese plekke gesit sodat die inwoners rustig in die tuin kan sit. Hulle het ook vir ons ‘n paar koeltebome geskenk.”
Binne-in die tonnel kan hulle help om die beddings in stand te hou en selfs van die vrugte pluk en eet. Die bestuur beplan om ‘n tipe koffiedrinkarea te maak waar familie saam met pasiënte kan kuier.