Top toekenning vir plaaslike advokaat, Cindy Marais
Advokaat Cindy Marais glo dat om te stagneer, baie vervelig kan wees.
Met hierdie wete in gedagte maak sy seker sy deel haar verantwoordelikhede tussen haar familie, haar werk en haarself.
Cindy het haar hoërskoolloopbaan aan Hoërskool Noorderland voltooi waarna sy by ‘n prokureurspraktyk as liasseerklerk aangesluit het.
“Ek het glad nie daaraan gedink om regte te studeer nie. Ek wou altyd ‘n vlieënier word, maar daar was nie geld om voltyds te studeer nie. Nou, meer as 20 jaar later, weet ek, ek het nie hierdie beroep gekies nie, maar die beroep het my gekies.”
Sy onthou hoe sy, met aanmoediging van die prokureur waar sy gewerk het, haarself binne maande opgewerk het tot litigasietikster.
“Dit alles het gebeur binne ‘n jaar vandat ek by die praktyk begin werk het. Die prokureur het gehelp om my vir die studies in te skryf en my ook geregistreer om my kandidaatklerkskap daar te voltooi. Ongelukkig het sy firma kort daarna toegemaak en hy het verhuis. Dit is as danksy hom dat ek vandag is waar ek moet wees.”
Cindy erken haar ure is lank en sy werk onder druk in ‘n stresvolle omgewing.
“As waarnemende regter in die hooggeregshof, moet jy maar weet dat jy elke dag iemand gaan hê wat vir jou vies is, want daar stap nie twee gelukkige partye uit die hof nie. Net een gaan waarskynlik gelukkig wees met jou uitspraak.”
Cindy het onlangs ‘n She Millionaire Africa Business Toekenning gewen.
“Dit was ‘n groot verrassing toe die organiseerders my laat weet ek is genomineer. Ek het eers gedink iemand trek nou weer my siel uit. Dit was ‘n nog groter verrassing toe ek wen. Ek het dit glad nie verwag of gesien kom nie.”
Cindy het die Women in Law-toekenning ontvang.
She Millionaire bemagtig vroulike entrepreneurs in Afrika deur hulpbronne, ondersteuning en geleenthede te verskaf om suksesvolle besighede te bou en ‘n positiewe impak op hul gemeenskappe te maak.
“Ek dink om enige tipe erkenning of toekenning te kry, gaan nie so erg oor jou loopbaan nie, maar eerder die wete dat ons op die regte pad is, nog harder moet probeer, sodat ons Sy plan vir ons lewens kan vervul, en om jou eie potensiaal ten volle te probeer
bereik.”