Van woelig en min aandag, tot ‘n pilletjie
In die moderne lewe is dit maklik om jou soms na ‘n pil of tablet te wend vir geringe probleme.
Sukkel jy om te slaap, drink jy ‘n slaappil. Het jy ‘n hoofpyn, drink jy ‘n pynpil. Daar is ‘n vinnige oplossing, en daar is onlangs op sosiale media mond uitgespoel oor die diagnose wat gemaak word in terme van kinders wat nie kan stilsit en konsentreer nie en daarna op medikasie gesit word.
Vir sommige ouers is Ritalin of Concerta ‘n vloekwoord, terwyl ander onwrikbaar daarin glo.
Klasse in staatskole is groot en kinders sukkel soms om in dié omstandighede te konsentreer. Onderwysers het hulle hande vol en wanneer hulle agterkom ‘n kind sukkel, maak hulle aanbevelings aan die ouer.
Polokwane Observer het by dr. Paul Vorster gaan aanklop om te gesels oor aandaggebrek-hiperaktiwiteitsversteuring (ADHS) en wat dit presies behels.
Nie almal wat aandagafleibaar is, is noodwendig hiperaktief nie, verduidelik hy.
“Daar word verskillende pille vir kinders voorgeskryf, afhangende van die behoefte. Alhoewel die pille verskillend is, is die aktiewe bestanddeel dieselfde, genaamd metielfenidaat. Die verskil tussen die pille is in die samestelling en vrystellingmeganisme wat bepaal waar in jou liggaam dit afgeskei word.”
Ouers is sensitief waar dit by hulle kinders kom en wil nie altyd onderwysers se aanbevelings aanvaar nie.
Volgens Vorster kan geen ouer gedwing word om medikasie op ‘n semi-permanente basis vir hulle kinders te gee nie, maar daar is wel meriete.
“Kinders is heeldag by die onderwyser en dié kan optel as iets nie reg is nie. Hulle kan dan slegs ‘n aanbeveling aan die ouer maak. Kry meer inligting voordat jy die onderwyser se mening bloot net afskiet.”
Skedule vyf medikasie kan ook nie deur enigiemand voorgeskryf word nie, vertel hy.
“Die kind moet eers deur ‘n arbeidsterapeut, psigiater of sielkundige geëvalueer word.”
Vorster verduidelik, net soos met bloeddrukmedikasie of antidepressante, werk dieselfde pil nie noodwendig vir alle kinders nie. Dus, sou die kind nie na wense reageer nie, moet die pille en dosis aangepas word.
“Soms is daar newe-effekte soos ‘n gebrek aan eetlus en slaaploosheid. Die pille maak sommige kinders té rustig, en daarom is daar verskillende soorte pille op die mark. Die pil is net agt tot 10 ure in jou kind se liggaam voordat dit uitgewerk het en jou kind sal nie ‘n ewige effek daarvan oorhou nie. Een pil is nie noodwendig ‘n beter opsie as ‘n ander nie, elke geval het sy eie meriete.”