Knaldemper – doen-dit-self
Ek oorweeg al vir ’ n geruime tyd om my .22geweer met ’n knaldemper toe te rus. My Brno is 57 jaar oud en nog in uitmuntende toestand. Die feit dat ek wesenlike veranderinge daaraan sou moes aanbring, het my altyd daarvan weerhou om vir dié geweer ’n knaldemper te kry.
So ’n paar maande gelede het ’n dringende verwikkeling my gedwing om dié saak te heroorweeg en met “dringend” bedoel ek dat daar nie eens tyd was om die geweer in te handig by ’n geweersmid om die nodige werk te laat doen nie. Die geweer moes die volgende dag operasioneel wees mét ’n knaldemper. Ná ’n sessie voor die rekenaar het ek besluit om eerder die doenditself (DDS) roete te volg aangesien nie een van die Googleplanne oortuigend gelyk het nie. betaal vir dit wat ek gebruik het, het my vriend my toegevoeg toe ek soos ’n warrelwind by die deur uit is.
Ek het begin deur ’n rowwe skets te teken van wat ek wou maak en toe die komponente uitgepak soos wat ek dink dit sou werk. Die doel was om ’n expansion chamber te maak, waarin die gasse wat die loop verlaat vasgevang kon word, terwyl die projektiel onverhinderd voortsnel na die teiken. Daar moes ook ’n skot of baffle wees, ’n ander vriend wat knaldempers uit staal bou, het my verseker dat een skot vir ’n .22geweer genoeg sou wees. My eerste poging was gelukkig suksesvol en ek het dit die volgende dag met welslae gebruik, maar daar was ’n paar tekortkominge (onder meer dat die demper skeef gedruk word as dit per abuis teen iets stamp en dit veroorsaak dat die koeëltjie die demper tref, wat onakkuraatheid en ’n stukkende demper tot gevolg het). Die resultaat van die oorspronklike een was egter bevredigend genoeg om my verder te laat eksperimenteer. Dit het gelei tot die baie bruikbare knaldemper wat ek hier voorhou.