As die handskoen jou pas
Alhoewel ons mense in Suid-Afrika nie gereeld handskoene dra nie, is ’n paar handskoene altyd ’n handige item om te besit. Handskoene word meestal geassosieer met koue weer, maar hulle kan vir veel meer aangewend word as om jou hande warm te hou.
Handskoene kan jou hande beskerm teen uitermatige hitte (byvoorbeeld as jy braai) of as jy doringtakke of ander skerp voorwerpe moet han- teer. Dit kom handig te pas as jy skielik ’n motor se band moet omruil of enige ander noodherstelwerk moet doen terwyl jy in jou kisklere staan en water nie geredelik beskikbaar is om jou hande agterna te was nie. Kortom, handskoene beskerm jou hande teen veel meer as net koue weer en elke jagter se bakkie kort ten minste een paar beskermende handskoene.
Ons het onlangs die geleentheid gekry om na verskillende modelle handskoene van Mechanix Wear te kyk en hulle uit te toets. Ons keuse het geval op ligte beskermende handskoene vir algemene gebruik en twee pare wat ook heel goed diens sal kan doen as skiethandskoene.
Hierdie maatskappy maak handskoene vir letterlik elke aktiwiteit waaraan ’n mens kan dink, selfs handskoene wat beskerming bied teen uiters hoë temperature soos renmotors se bande en remskoene.
Die modelle wat ons onder oë gehad het, was die Original, ’n ligte veeldoelhandskoen van sintetiese leer en materiaal; die 0.5mm Original, ’n ligte en baie dun veeldoelhandskoen vir wanneer jy dieselfde beheer wil hê soos met kaal hande en vingers; die Grip, waarvan die palmgedeelte met klein rubberknoppies (Armortex Grip) bedek is »