Eg Suid-Afrikaans maak mooi skoon
Met alles wat deesdae in ons land aangaan is dit lekker om op ’n plaaslike produk af te kom wat werklik trots Suid-Afrikaans is. Dit was net voor die 7uur-nuus een Donderdagaand toe ek vir die eerste keer die SA Tumbler-dopskoonmaker uit sy boks haal. Tydens hierdie skoonmaakproses word geweeren pistooldoppe in ’n drom, gevul met ’n tuimelmedia, getuimel om hulle skoon te maak. Ek moet erken ek was opgewonde om ’n produk te toets wat kan kers vashou of selfs beter is as die internasionale produkte.
Ted Knowles, een van die vaders van SA Tumbler, het ongeveer ’n jaar gelede die idee gekry om hierdie dopskoonmaker ( tumbler) vir die plaaslike skieten jagmark te ontwikkel. Soos ek verstaan was maande se ontwikkeling, verandering en aanpassings nodig om dié dopskoonmaker te kry waar dit vandag is. Ted wou ’n gehalte-produk ontwikkel wat nie net beter is as dié wat ingevoer word nie, maar wat hy ook teen ’n beter prys aan die publiek beskikbaar kan stel. Dit is redelik algemeen bekend dat die meeste produkte deesdae in China vervaardig word. Vandaar word dit uitgevoer na Amerika waar ’n agent dit herverkoop en dit dan verskeep na ander lande. Elke rolspeler in hierdie proses laai sy gedeelte by die prys; teen die tyd dat jy dit dus op die rakke van jou naaste wapenwinkel bekyk, is daardie prys heelwat meer as wat dit was toe dit in China op die skip gelaai is. Deurdat SA Tumbler plaaslik ontwikkel en vervaardig word, beteken dit die prys kan billik gehou word.
Maar hoe goed werk die SA Tumbler? Nadat ek die produk getoets het, kan ek daarvan getuig dat dit soos ’n droom werk. Alles wat jy nodig het, kom in die boks waarin dit verpak is. Dit het my slegs 10 minute geneem om alles reg te kry en die skoonmaakproses te begin.
Jy kry die volgende: 2kg se tuimelmedia (vlekvrye staalpennetjies), wynsteensuur ( tartaric acid), skottelgoedseep, drom, die kragbron en dan die duursame SA Tumbler-masjien. Volgens Ted sal die media nie roes nie en sal jy dit vir baie lank kan gebruik. Selfs as die skoonmaakproses klaar is, kan ’n mens net ’n magneet gebruik om die media van die doppies te skei. Die wynsteensuur en die skottelgoedseep gaan saam met die water in die houer. Daar is ander produkte op die mark wat dieselfde doel verrig, maar ek moet sê, dié wat verskaf is, werk baie goed en is natuurlik baie bekostigbaar om te vervang sodra dit opgebruik is. Die drom, kragbron en die masjien self is van baie hoë gehalte en op die oog af kan jy sommer sien dat dit jare se werkverrigting gaan lewer.
Die SA Tumbler het ’n eenjaarwaarborg. Sou daar enige probleme met die produk wees, is die vervaardiger in Suid-Afrika en sal jy dit maklik en vinnig kan uitsorteer. Gedurende my toets het ek net so oor die vyftig 7x64doppe op ’n slag skoongemaak, maar volgens die vervaardiger kan ’n maksimum van 200 .308-doppe en naby aan ’n 1 000 9mm-doppies op een slag skoongemaak word. Die SA Tumbler het lag-lag vir 24 uur teen die maksimum-kapasiteit gewerk sonder enige probleme.
Die proses is baie maklik: Plaas die vlekvrye staal-media in die drom; sit die doppe in; voeg een teelepel wynsteensuur en een teelepel skottelgoedseep by; maak die drom driekwart vol met water en seël dit mooi; skud dit so ’n bietjie en los vir ’n uur of selfs oornag en skakel daarna die SA Tumbler aan. Die tumbler het tydverstellings wat in inkremente van 10 minute werk tot ’n maksimum van 90 minute. So, as die doppe baie vuil is kan jy hulle vir 90 minute lank tuimel in die drom vir die maksimum skoonmaakkrag. Sodra dit klaar is, spoel die doppe met louwarm water af en sit dit vir ’n paar minute in die oond teen 50 ˚C om te droog.
Ek is baie in my skik met die SA Tumbler want dit voldoen aan internasionale standaarde en teen ongeveer R4 200 is die prys baie mededingend met dié van soortgelyke ingevoerde produkte. • Vir meer inligting skakel Ted Knowles by 078-354-6262 of stuur ’n e-pos na edknowles@ mweb.co.za. • Gaan loer gerus ook op hulle webtuiste www.satumbler.co.za om die produk in aksie te sien.