Manjifieke MAUSERS
Etlike maande gelede stap ek een laatmiddag by Danie Joubert se werkswinkel in Pretoria in om ’n werkie te bespreek wat ek aan een van my roere wil laat doen. En soos dit maar altyd gaan, laat dwaal ek toe my oë oor die klaar en halfklaar gewere wat op ’n rak teen die een muur pryk.
Daar staan hulle toe, twee gewere op Mauser-aksies gebou, nog half klaar en soos die Engelse sê, “in the white”, met ander woorde die staal was nog nie geblou nie. Tog was dit baie duidelik dat albei dié gewere bloubloed-menere was – iets waarmee jy jouself kan bederf vir Kersfees... of sommer enige tyd van die jaar omdat jy met geweerkruit in jou are gebore is.
Toe dié pasmaats uiteindelik klaar was, het Danie my genooi om weer na hulle te kom kyk.
Hierdie besondere gewere is beide op Vektor se vierkantbrug-Mauseraksies gebou, een in .416 Rigby en die
ander in .450 Rigby. Die eienaar, Leon Lecuona van Johannesburg wou twee pasmaakgewere hê wat in alle opsigte (behalwe die kalibers) eenders sou wees. Dis nogal belangrik vir groot kaliber gewere wat aangewend word op enigiets wat kan byt, krap, stoot, trap of gaffel as hulle beneuk raak. As jy ’n paar dae aaneen met die .416 op buffelspore gestap het en jy dan die volgende dag besluit om met die .450 olifante te gaan soek, wil jy dit nie met ’n geweer doen wat effens vreemd voel of anders hanteer nie.
Wanneer jy gevaarlike wild jag, wil jy ook hê dat jou geweer genoeg patrone in die magasynkas neem – albei hierdie gewere het ’n magasyn kapasiteit van vier.
Danie se beplanning het ook goed uitgewerk want die gewere se gewig, as hulle nie gelaai is nie, is prakties gesproke dieselfde, naamlik 5.2kg (ek dink die een is iets soos 30 gram ligter).
Om dié pasmaats so na as moontlik aan mekaar te laat lyk, ook wat die kolwe betref, is een groot stuk Turkse okkerneuthout bestel waaruit beide die kolwe toe gemaak is. Faan de Vos, wat seker geen bekendstelling nodig het nie, het die kolwe gemaak.
Soos op die foto’s gesien kan word, het Danie opdrag gekry om Holland & Holland-tipe oop visiere vir beide te maak en dan ook vinnig afhaalbare, Holland & Holland-tipe symonterings vir die teleskope. Beide gewere is toegerus met Schmidt & Bender se Exos 1-8x24-teleskope.
Die lope is 58.5cm lank en die treklengte ( length of pull) 36cm. Beide se lope het ’n ekstra terugskopnok of recoil lug om te help om die terugskop in die kolf te versprei. As daardie ekstra nok uitgelaat word veroorsaak dit baie male dat die kolwe van sulke groot kalibergewere kraak. Die sneller druk- king van die twee gewere is ook dieselfde, naamlik 1.2kg.
Behalwe vir die mooi hout is daar ’n ander paar versierings wat dié gewere iets besonders maak. Beide dra uitstekende graveerwerk deur die bekende Armin Winkler. Die .416 het ’n buffel op die magasynplaat gegraveer en die .450 ’n olifant. Verder is die visiere ook mooi gegraveer en die kaliber is in goud op elke geweer aangebring. Die geweernommer pryk op die snellerbeuel en op die slagpenhuls is daar ’n pyltjie in goud wat aandui in watter rigting die veiligheidsknip gespan moet word – alles baie elegant en smaakvol. Net om dubbel seker te maak dat jy nie die verkeerde roer gryp as die grootvoete naby is nie, is die kaliber ook op die agterste teleskoopring gegraveer.
Dis te laat om jouself vir hierdie Kersfees te bederf met so ’n paar pasmaakgewere, maar as jy nóú vir Danie kontak en jou bestelling plaas, mag jy hulle dalk net voor die volgende Kersfees ontvang. • Vir meer inligting oor Danie se werk en die tipe gewere wat hy bou, kontak dié meester by 083-326-8290.