Sporting Rifle 'n nuwe uitdaging
Skuts bou internasionale bande by skietdag ten spyte van ongure weerstoestande.
Die SAJWV is geaffilieer by die Britse Gallery Shooting-sportskiet dissipline wat ’n aantal internasionale lede het. Hierdie sport bestaan uit verskillende skiet dissiplines waarvan Sporting Rifle een is.
Sporting Rifle bestaan op sy beurt ook weer uit ’n aantal skietoefeninge en dit word met jaggewere geskiet waarvan die minimum-kaliber 6mm is en die gewere se gewig beperk word tot 6.5kg. Daar is geen beperking op die tipe teleskoop of die vergroting daarvan nie. Slegs een geweer mag vir al die oefeninge gebruik word.
Dié skietkompetisie word op ’n skietbaan afgehandel op afstande van 50m, 100m, 200m en 300m en daar word na volgrootte, volkleur-diereteikens geskiet waarvan die telareas (brein- en hart/longareas) met fyn lyntjies aangedui word. Skuts kan hierdie lyntjies nie op die skietafstande sien nie en moet dus weet waar om op die dier te mik.
Deelnemers neem altyd in spanverband deel, maar individuele tellings geld ook en daar word dus ook ’n individuele wenner aangewys. Die lede van die SAJWV se Gallery-span neem al die afgelope vier jaar jaarliks in Bisley, Engeland, deel aan die Sporting Rifle en ander Gallery Rifle-dissiplines. Hierdie jaar het ’n Engelse en Australiese span egter vir die eerste keer SuidAfrika besoek om teen die SAJWV-span in Sporting Rifle deel te neem. Daar is ook in die ware Gallery Rifle-dissipline deelgeneem – daaroor berig ons in ’n volgende uitgawe.
VYF OEFENINGE
Sporting Rifle bestaan uit vyf oefeninge (normaalweg drie, maar die reëls is so ’n bietjie aangepas vir die Suid-Afrikaanse kompetisie) waartydens daar elke keer 10 skote geskiet word, dus 50 skote in totaal. Die hele oefening word twee maal geskiet sodat ’n wedstryd dus uit ’n groottotaal van 100 skote bestaan.
Tydens Oefening 1 word 10 skote vanaf 100m na ’n Europese reebokteiken geskiet – vyf skote uit die sitposisie oor ’n rus met ’n enkele steunpunt en vyf skote uit die lêhouding waar daar van ’n Harris-tipe tweepoot gebruik gemaak mag word. Daar is ’n tydsbeperking van 90 sekondes vir die vyf skote in elke posisie. Die oefening is maklik maar die hooftelarea is klein.
Oefening 2 word vanaf 200m geskiet na ’n Europese vosteiken. Vyf skote word uit die sitposisie geskiet oor skietstokke met ’n enkele steunpunt of ’n Harris-tipe tweepoot. Daarna word vyf skote uit die staanhouding geskiet oor skietstokke met ’n enkele steunposisie. Hierdie is ’n moeilike oefening, veral as daar rukwinde waai.
Die SAJWV se springbokteiken word vir Oefening 3 gebruik en daar word op 300m daarna geskiet. Al 10 skote word uit die lêposisie geskiet vanaf skietstokke of ’n Harristweepoot. Die geweer se kolf aan die agterkant mag wel die grond raak, maar geen sandsakkies as rus of iets soortgelyks word toegelaat nie. Vyf minute word vir die 10 skote toegelaat.
Gedurende Oefening 4 word daar op 50m na die SAJWV se vlakvarkteiken geskiet. Die 10 skote word almal uit die staande posisie geskiet – eers vyf skote in 60 sekondes en daarna vyf skote snapskiet met ’n tydsbeperking van vyf sekondes vir elke skoot. Tydens die snap skietoefening word die bevel omte vuur vir elke skoot gegee, waarna die tyd geneem word.
Die laaste oefening word weer op 100m geskiet en na die SAJWV se rooibokteiken. Twee skote moet uit die staanhouding sonder rus geskiet word binne 30 sekondes, dan twee skote vanuit die knielposisie ook sonder enige geweerrus, binne 30 sekondes. Hierna volg drie skote uit die sitposisie in 40 sekondes, ook sonder rus en laastens drie skote uit die lêposisie vanaf net die elmboë, ook in 40 sekondes.
’N UITDAGING
Behalwe vir die reebok-oefening is hierdie skietkompetisie nogal ’n uitdaging en wat dit méér so maak, is die feit dat jy so baie skote skiet. Skuts moet dus vir veel langer konsentreer en ’n hoë mate van akkuraatheid handhaaf om goeie tellings te skiet.
Die eerste amptelike Sporting Rifle-kompetisie is onlangs op die Charles Krugel-skietbaan, wat tussen Grootvlei en Balfour geleë is, gehou. Daar het drie SAJWV-spanne deelgeneem, ’n span van CHASA (Confederation of Hunting Associations of South Africa) en natuurlik die spanne van Brittanje en Australië. Om die SAJWV-spanne saam te stel, is die topskuts wat aan die 2015 Nasionale Presidentskiet deelgeneem het, uitgenooi om in Juniemaand aan proewe deel te neem op die Genl. Piet Joubert-skietbaan.
Die Duikertak van die SAJWV was die gashere van hierdie kompetisie en het al die reëlings daarvoor getref. Baie dankie aan André Davel, Ockert Scheepers en die res van die Duikertakspan wat vrywillig en sonder enige vergoeding hierdie taak aangepak het. Die baanoffisier was Piet Peach en Hansie Lerm het die punteverwerking gedoen.
Ongelukkig het die weer nie saamgespeel nie. Dit was swaar bewolk die oggend met die aanvang van die kompetisie en daar het ’n baie sterk dwarswind gewaai. Dit het veral die skietoefeninge vanaf 300m op die springbok baie uitdagend gemaak en ook alle oefeninge waartydens die deelnemers moes staan en skiet. Selfs die sithouding het probleme veroorsaak omdat die wind bykans die hele dag rukkerig gewaai het. Dit was net eenvoudig onmoontlik om die geweer op die teiken te probeer hou met enige van dies t aanhouding-oefeninge. Deelnemers moes as’t ware maar die snellers pluk die oomblik as die geweer iewers oor die teiken dwaal. »
» Ten spyte van die swak kondisies het ’n hele paar manne goeie tellings geskiet.
Die son het later uitgekom, maar ongelukkig het die wind glad nie bedaar nie. Die manne en dames moes toe maar bly spook om die beste van ’n moeilike saak te maak.
DIE WENNERS
Die SAJWV se A-span het gewen met ’n telling van 4 087.70 uit ’n moontlike 5 000. In die tweede en derde plekke was die B-span en die C-span van die SAJWV met tellings van 3 878.57 en 3 757.55 onderskeidelik. Die getalle agter die punte verwys na die aantal v-kolle wat elke span geskiet het.
Die individuele wenner was Hercules Louw van die SAJWV se A-span met ’n telling van 874.19 uit 1 000. Hercules het ook onlangs die SAJWV se nasionale President skiet kompetisie gewen. Tweede was Stuart Riddle met 840.13 en derde Jan Taljaard met 829.15. Beide hierdie skuts was ook lede van die SAJWV se A-span. Die CHASA-span het die vierde plek ingeneem, gevolg deur die spanne van Brittanje en Australië. Die besoekers het die toestande baie uitdagend gevind en sommiges moes ongelukkig met geleende gewere deelneem, wat dinge verder bemoeilik het. Hierdie kompetisie was egter ’n brugbou-geleentheid wat die geleentheid geskep het vir oorsese besoekers om in die toekoms weer hier te kom deelneem.
Hercules se geweer is ’n standaard Howa in .308 Win met ’n 23.2”-loop en ’n standaard Euro Varminter-kolf. Die loop is oorspronklik, maar Hercules het wel die kamer laat oor sny (met ’n korter sprong na die lande toe) sodat hy sy patrone korter kan laai, steeds goeie akkuraatheid kan kry en dit maklik uit die magasyn uit kan voer. Die sneller is ook standaard, maar Hercules het self daaraan gewerk sodat dit lekker lig en glad kan breek. Hy het 168gr Nosler Custom Competition-koeëls gebruik, S341 kruit, Winchester LR-slagdoppies en RWS-doppe. Die doppe se nekke is nie gesny/geskil nie en hulle is ook nie volgens gewig geklassifiseer nie. Hercules het die geweer “ingebreek” deur Sudami se lapping bullets deur die loop te skiet. Hierdie Howa is in staat om 30mm-groeperings op 300m te skiet. Die teleskoop wat Hercules gebruik het, is Lynx se nuwe 5-30x56 kompetisie-teleskoop.
Safari Outdoor het die SAJWVspanne se spandrag geborg. Hulle is reeds jare lank aktief betrokke by skietsporte in Suid-Afrika en verskaf gereeld borge aan verskillende skiet- en jagverenigings en skiet dissiplines.
Hierdie kompetisie was ’n baie geslaagde eerste in Suid-Afrika en die SAJWV sien uit daarna om hierdie sportdissipline in die toekoms verder te laat groei.