Hoe lyk die pad vorentoe?
Vir baie mense is 2016 ’n jaar wat hul liewer sal wil vergeet. Droogte het ons land bloots gery en sommige boere by bankrotskap laat draai. Polities blyk Suid-Afrika meer verdeeld te wees as ooit tevore. Korrupsie van staatsamptenare vier nou éérs hoogty en selfs ons jagbedryf ry sinkplaatpad.
En om alles te kroon, gaan staan en verloën die Springbokke toe ook nog die eens trotse groen trui. Ja nee, dit was inderdaad ’n vreeslike jaar, ’n annus horribilis soos ons geleerde vriende in Latyns sou sê.
Maar dis het einde niet! Voeg hierby die geskille in jaggeledere oor ’n hele reeks aspekte; van geteelde leeujag tot rooibokpryse en jy het ’n hutspot wat dreig om te ontplof. Behalwe die leeujagkwessie is daar onder meer ook ’n groot polemiek oor watter jagtegnieke as eties of dan as sogenaamde fair chase skou kan of moet word.
Daar is ’n faksie wat glo dat ons eties moet probeer jag om sodoende jag meer aanvaarbaar vir die algemene publiek te maak. Ander glo weer dat dit geen indruk op die greenies maak hoe ons jag nie – hulle wil alle jag gestop sien. Diegene wat dus etiek bepleit, word deur sommiges gesien as greeniegatkruipers.
Volgens statistieke gaan jag baie mense (veral oorsese jagters) om uiteenlopende redes deesdae eerder in Namibië as in Suid-Afrika. Tog staan drie redes sentraal in baie mense se besluite om Suid-Afrika te vermy: geteelde leeujag in SA; die aanbied van makgeteelde wild vir jag (ook kleurvariante) en derdens klein, toegespande jagplasies. Dié punte is bevestig op ’n paneelbespreking tydens PHASA se jaarvergadering. Blykbaar was drie van die vier be- paneellede buitelanders.
Iets heel anders... In Donald Trump sien sommige Suid-Afrikaanse vuurwapenentoesiaste ’n Messias. Nóú sal ons darem vuurwapens, ammunisie en herlaaikomponente kan koop, glo hulle. Dié Amerikaanse voorstander van jag en skietgoed sal glo sorg. Regtig? Hy het ook ’n paar baie negatiewe dinge oor Suid-Afrika gesê en ’n mens wonder maar net of hy nie dalk alle Suid- Afrikaners onder dieselfde kam skeer nie. Tyd sal wel leer.
En wat sal met die pryse van alle ingevoerde produkte gebeur as ons afgegradeer word tot rommelstatus? Sal ons dalk deur ons nekke moet betaal vir ons skiet- en jagplesiertjies?
Op die oog af lyk dit mos sommer al klaar of 2017 nóg ’n nagmerrie gaan wees. Maar gaan dit? Is dit nie ook waar dat daar uit elke donker nag weer ’n nuwe dag gebore word nie? Moet jy nie eers kniel of lê voordat jy opgehelp kan word nie?
Aan sekere goed kan die mens niks verander nie maar daar is heelwat wat ons wel kan doen. Ons hoef nie omstandighede net te aanvaar nie. Om verandering teweeg te bring mag jou dalk geld kos, innoverende denke verg, daadwerklike optrede vereis en/of vra dat jy ’n gesindheid van leef en laat leef moet openbaar. Vir sommige is die laaste een miskien die moeilikste.
Kom ons kyk vorentoe, iewers op die horison wag daar lig. En om daar uit te kom, móét ons met die reis begin... al is dit treetjie vir treetjie. Laat ons dus die swepe klap, 2017 lê voor.