Docter jou jag reg

’n Ware jagteleskoop sonder enige fieterjasies is ’n resep vir sukses.

Jagters en skyfskietskuts is geseënd in die sin dat daar deesdae teleskoopfabrikate beskikbaar is om van te kus en te keur. Die verskeidenheid is so groot dat voornemende kopers soms glad nie weet wat om te koop nie.

Een fabrikaat waarmee ek nie so bekend was nie, is Docter. Die naam was bekend maar ek het nog nooit een op die skietbaan of in die jagveld gebruik nie. Dié sakie is reggestel toe Riaan Vermaak van Die Koöperasie in Humansdorp so ’n paar maande gelede vir ons ’n Docter Classic in 3-12x56 gestuur het om te bekyk. Anders as wat soms die geval is, kon ek ook dié Duitser in die jagveld gebruik – ’n jag in die Oos-Kaap naby Kareedouw.

Maar waar kom Docter-teleskope vandaan? Docter is ’n Duitse maatskappy wat sy hoofkwartier in Eisfeld het en deel uitmaak van die Analytik Jenagroep van maatskappye. Docter het oorspronklik uit die ou Carl Zeiss AG-maatskappy onwikkel. Na die Tweede Wêreldoorlog (in 1952) is VEB Carl Zeiss Jena gestig in Eisfeld wat natuurlik toe in kommunistiese OosDuitsland geleë was. Ironies genoeg was Oos-Duitsland se amptelike naam Die Duitse Demokratiese Republiek. Vir jare lank het daar dus eintlik twee Zeiss-maatskappye bestaan, die een in Wes-Duitsland en die ander in Oos-Duitsland.

’n Jaar na die unifikasie van Duitsland is die voormalige Oos-Duitse maatskappy oorgeneem deur Bernhard Docter en die naam is toe verander na Docter Optic Eisfeld GmbH. Moeilike tye het gevolg en Docter Optic het hulself in 1995 bankrot laat verklaar. In Mei 1997 het ’n deel van die ou maatskappy met 40 werknemers »