Vervoer jou roer só
’nGoeie geweersak is ’n onontbeerlike noodsaaklikheid vir elkeen wat gewere skietbaan of jagveld toe wil vervoer.
Daar is ’n groot verskeidenheid geweersakmodelle en fabrikate op die mark waarvan materiaalsakke met sponsvoering seker die gewildste is. Ons het onlangs so ’n sak van Bushill RSA onder oë gehad en was beïndruk met die ontwerp.
Die meeste geweersakke het ’n kenmerkende vorm wat meer spits is na die kant toe waar die geweerloop in die sak rus. Dit veroorsaak dat jy nie eintlik ’n tweepoot aan die geweer kan los as jy dit in die sak wil sit nie. En soos almal weet, strek die ritssluiter ook tot aan die agterkant van die geweer tot by die toon van die terugskopkussing. Dit veroorsaak dat jy die ritssluiter heeltemal moet toemaak om te verhoed dat die geweer uitgly as jy die sak optel.
Bushill se geweersak verskil van ander in die sin dat dit reghoekig is en dat die ritssluiter dus net aan die bokant van die sak aangebring is. ’n Geweer kan dus heel veilig in die sak gedra word sonder om die ritssluiter heeltemal te moet toemaak. Die feit dat die sak reghoekig is beteken ook dat daar ruim plek is vir ’n geweer met ’n tweepoot daaraan geheg.
Hierdie baie handige geweersak word voorsien in twee lengtes naamlik 48”en 54”. Die langer sak kan ’n geweer met ’n 24”-loop en ’n kort knaldemper huisves. Daar is een klein kantsakkie aan die buitekant aangebring waar die handvatsels geleë is. Behalwe vir die twee handvatsels het die sak ook ’n verstelbare skouerdraband. Hoëkwaliteit, swaardiens YKK-ritssluiters word gebruik en elke sak is toegerus met twee ritssluit-skuiwers.
In die binnekant van die sak is daar ’n ingeboude flap om as addisionele beskerming vir die teleskoop te dien en daar is ook twee materiaalbande vasgewerk wat gebruik kan word om die geweer rondom die pistoolgreep in die sak vas te maak. Hoëdigtheid-spons wat 25mm dik is, word regdeur die sak gebruik as voeringmateriaal.
Sommige geweerentoesiaste sal dalk ’n groter sak of meer as een sak aan die buitekant wil hê om goed soos oorbeskermers en ammunisie te stoor. Ek het egter gevind dat daar met die 54”-sak meer as genoeg plek is vir oorbeskermers en skiethandskoene binne-in die geweersak.
Hierdie ruim geweersak van Bushill is een van die handigste sakke wat ek nog gebruik het en ek beveel dit met die grootste vrymoedigheid aan. Teen ’n voorgestelde kleinhandelprys van R720 vir beide die korter en langer sak is hierdie produk uiters goeie waarde vir geld. • Bushill RSA se geweersakke is landswyd beskikbaar by handelaars, maar indien jou gunsteling-handelaar dit nie aanhou nie, vra hom om Bushill te kontak by 012-348-0317 of 021945-2160 of besoek Bushill se webblad by www.bushill.co.za