Sauer en Sig Sauer se wenners
JP Sauer & Sohn is ’n ou Duitse maatskappy uit 1751 wat tot vandag toe nog beken dis vir kwaliteitprodukte. S au e r-gewer eis al vir baie jare nie net in Duitsland ’n gunsteling nie, maar regoor die wêreld.
Sauer is oor die algemeen sinoniem met duur, hoë-kwaliteit gewere, maar die moderne mark het dié maatskappy gedwing om ook meer bekostigbare produkte te versprei. Goedkoop Amerikaanse en Japannese gewere is baie gewild en Sauer moes ’n teenvoeter daarvoor vind. Die resultaat is die Sauer 100 wat vir ongeveer R17 000 verkoop. Dis wel meer as wat sommige ander intreevlakgewere kos, maar Sauer se kwaliteit kan nie bevraagteken word nie.
Ons het onlangs ’n S100 van naderby beskou en ook ’n paar skote daarmee op die skietbaan geskiet. Hierdie Sauers is beskikbaar met ’n beukehoutkolf (beech wood) wat gekleur is, asook met ’n sintetiese kolf. Ons toetsmodel het die houtkolf gehad. Iets wat dadelik opval, is dat die kolf vir beide regterhandse en linkerhandse skuts geskik is. Daar is geen wangstuk nie en die pistoolgreep het aan beide kante ’n palm swell. Laser-gesnyde ruitwerk versier die voorlaai en die pistoolgreep. Die voorlaai eindig ook in ’n netjiese schnabel. Hegpunte vir bandskakels is op die normale plekke aan die voorlaai en agterkolf aangebring en die kolf word afgerond deur ’n dun, swart skopkussing.
Soos dit met die meeste in- treevlak-gewere die geval is, het die Sauer ook maar sy stukkie plastiek – die magasynkas is van ’n polimeerplastiek gemaak. Die magasynkapasiteit is vyf patrone vir standaard-kalibers en vier vir magnums. Patrone word trapsgewys (staggered) in die magasyn gepas, wat meebring dat jy die magasyn vol kan maak sonder om dit uit die geweer te verwyder. Verblydend is egter dat die magasynknip mooi versink lê in die vloerplaatgedeelte reg voor die magasynkas. Hierdie is een magasynkas wat jy nie sommer maklik sal verloor deur die magasynknip per ongeluk te aktiveer nie.
Soos met baie van die Euro- pese modelle die geval is, sluit die grendel nie in nokgleuwe in die aksie nie, maar in gleuwe in die loop self. Dis gewoonlik die geval waar daar van ruilbare lope gebruik gemaak word en waar die lope deur ’n krimpproses aan die aksie gepas word. Die agente vir Sauer, die L&Ogroep, sê egter dat die Sauer 100 se loop indraai en nie in plek gekrimp word nie. Al Sauer se lope word deur die koue hamerproses gevorm.
Soos julle uit die foto kan aflei, is die grendelstam dieselfde deursnee as die sluitnokke en let op dat die S100 drie sluitnokke het in stede van twee opponerendes. Dit bring mee dat die
grendelhefboom net sowat 60° gelig moet word om dit te ontsluit vir herlaai. ’n Veerbelaaide uittrekker asook twee veerbelaaide uitwerpers word in die versinkte grendelkop gehuisves. Die twee uitwerpers (sien foto bo) sorg dat doppe baie positief uitgewerp word.
Die aksie is geboor en getap vir teleskoopmonteerbasisse en baie sal bly wees om te verneem dat enige basisse wat geskik is vir die Remington Model 700, op die Sauer pas. Sauer self beveel egter hulle Hexalock-basis/ ringstelle aan en dis waarvan die toetsgeweer voorsien was. Hierdie vinnig-afhaalbare monteersisteem werk met ’n hefboom wat aan elke teleskoopring vas is. Die hefboompie word bloot vorentoe geswaai waarna die teleskoop met ring en al verwyder kan word (sien foto).
Anders as sommige meer bekostigbare gewere, is die Sauer 100 van ’n drieposisie-veiligheidsknip voorsien. In die agterste posisie word die slot heeltemal gesluit en kan die geweer nie vuur nie. In die middel-posisie kan die geweer steeds nie vuur nie, maar dit laat jou toe om die grendel/slot oop te maak en die geweer te laai of om ’n patroon uit die kamer te verwyder. In die voorste posisie is die geweer natuurlik ten volle operasioneel. Wanneer die Sauer oorgehaal is, steek ’n pennetjie wat rooi gekleur is by die slagpenhuls uit en kan jy met een oogopslag sien of die geweer oorgehaal is al dan nie. Die grendelstop sit agter aan die linkerkant van die aksie. ’n Lang reguit gleuf in die grendel, waarin die grendelstop pas, verseker dat die grendel op die grendelstop ry en dit sorg vir die gladde werking van die grendel. Die grendelhefboom is van staal, maar word afgerond deur ’n sintetiese grendelknop.
Sauer 100’s word gewoonlik nie van oop visiere voorsien nie en dit was ook die geval met die toetsgeweer. In standaard-kalibers is die loop 56cm (22”) lank terwyl magnum-kalibers van 61cm (24”)-lope voorsien word. Die Sauer 100 is tans in 12 kalibers beskikbaar (.222; .223; .243; .270; .308; .30-06; 6.5mm Creedmoor; 6.5x55; 8x57; 9.3x62; 7mm Rem Mag en .300 Win Mag). Standaard-gewere weeg 3.05kg en die .308 en .30-06 word voorsien van lope waarvan die groefdraai 1 in 11” is. Die 6.5’e se groefdraai is 1 in 8.6”.
Ek was aangenaam verras met hoe lekker die geweer hanteer, hoe goed die kolf my pas en hoe gemaklik die pistoolgreep in my hand voel. Die palm swell is presies die regte grootte vir my hand en as ek die geweer aangooi, lê dit dadelik op die teiken.
Die verstelbare sneller (2kg tot 1kg) is reeds in die fabriek lig gestel, het mooi skoon gebreek en was ’n plesier om te gebruik.
Tydens die twee skietbaansessies het die Sauer, wat vir die .308 Win-patroon gekamer is, sonder enige probleme gefunksioneer. Dit het glad gevoer en die doppe te alle tye positief uitgewerp, maak nie saak hoe vinnig ek die geweer oorgehaal het nie. Die feit dat die grendel net 60° lig, maak dat jy hierdie geweer baie vinnig kan oorhaal.
Tydens die eerste sessie het ons vyf drieskoot-groeperings van die skietbank af geskiet op 100m met Norma se 165gr-ammunisie. Die toetsgeweer het hom heel goed van sy taak gekwyt en die gemiddeld van die vyf groepe was net oor die 30mm.
Die S100 is ’n geweer wat ek met vrymoedigheid aanbeveel.
Die L&O-groep versprei ook Sig Sauer optiese produkte – teleskope en afstandmeters. Saam met die Sauer-geweer het ons die geleentheid gehad om ’n Sig Sauer-teleskoop, die Tango4 6-24x50 wat ’n 30mm-buis het, onder oë te neem. Sig Sauer, ’n oorspronklike Switserse maatskappy se hoofkwartier is al vir etlike jare in Amerika. Onder die saalgedeelte (waar die stelknoppe geleë is) staan duidelik dat die Tango4 in Oregon ontwerp is, wat dié produk se Amerikaanse oorsprong bevestig.
Sig Sauer is onder die meeste mense bekend vir die hoë-kwaliteit pistole wat hul vervaardig. In 2015 het Sig Sauer tot die optiese mark toegetree. Hoewel hulle nog in hul babaskoene is wat optiese produkte betref, kan ’n mens nie anders as om beïndruk te wees met die kwaliteit van die Sig Sauer-teleskope en -afstandmeters nie.
Die afwerking van die Tango4 »
» 6-24x50 is werklik goed en die stelknoppe draai nie te maklik nie. Wanneer ’n mens sommige teleskope se stelknoppe draai, is die klikkies nie duidelik hoorbaar nie en dit voel amper asof die ratjies daarvan uitgewerk of nie goed afgewerk is nie. Dis beslis nie die geval met die Sig Sauer nie. Begin aan hom stel en jy kom agter, dié produk is kwaliteit. Wat dadelik opval, is die gryskleurige afwerking van die teleskoop en sy taktiese-tipe stelknoppe sonder doppies.
Die parallaks verstelling i sop die normale plek aan die linkerkant van die saal en vorm ’n integrale geheel met die kruishaar se ligskakelaar. Hierdie twee-in-een stelknoppe is deesdae standaard op baie teleskoopmodelle. Die parallaks verstelling fokus die beeld vanaf 50m.
’n Unieke funksie van dié teleskoop is die venstertjie met merkers agter aan die vertikale stelknop wat die gebruiker in staat stel om dadelik te sien op watter rotasie die stelknop is. Dit kan ’n maksimum van vyf rotasies stel en elke rotasie verteenwoordig 12MOA – dus 60MOA-verstelling in totaal. Elke klikkie stel die trefpunt ’n ¼MOA aan op 100 jaarts (ongeveer 7.2mm op 100m). Die stelknop vir rigting (regs en links) het ook ’n sluitfunksie wat verhoed dat dié per abuis gedraai word en die teleskoop uitstel.
Soos deesdae die gebruik is met baie teleskope, is die oogstuk van die Sig Sauer van die vinnige fokus-tipe. Die model wat ons geëvalueer het se kruishaar is in die eerste of voorste fokusvlak of -seksie geleë en raak dus al “vetter” soos die vergroting opgedraai word. In realiteit beteken dit maar net dat die kruishaar se afmetings en die spasie tussen die afmikmerkies in verhouding tot die teiken altyd dieselfde bly, maak nie saak op watter vergroting dit gebruik word nie. As jy dus die teleskoop se afmikmerkies met jou lading/ koeëlkombinasie gekalibreer het, kan jy hulle op alle vergrotings gebruik om in die kol te skiet op die gekalibreerde afstande.
Die MOA-tipe kruishaar verlig heeltemal as die beligting aangeskakel word. Vir sommige kan dit ’n probleem wees aangesien so ’n hele verligte kruishaar dit soms moeilik maak om die teiken daaragter te sien as jy in die nag skiet. Die oplossing is om die laagste verligting te gebruik wat jou sal toelaat om die kruishaar te sien.
Ek het baie van die swewende kolletjie gehou wat as die kruishaar se middelpunt gebruik word. Vir my oë werk sulke kolletjies baie goed. Volgens my mening is die spasies tussen die afmikmerkies ’n bietjie te groot en nie regtig van praktiese nut nie. Dis egter ook ’n feit dat baie skuts liewer hul teleskope vir afstand stel as om die afmikmerkies te gebruik. Indien jy stel, kan jy jou eie zero-afstande bepaal. Met vaste afmikmerkies is jy gebind tot sekere zero-afstande.
Wat die glas se helderheid betref, kan ek noem dat die Sig Sauer uitstekend vergelyk met teleskope wat soortgelyk geprys is op die mark. Die meeste handelsmerke word deesdae van baie goeie glas voorsien wat helderheid en skerpheid van die beeld verseker en jy moet werklik goeie oë hê om die verskil in helderheid tussen sommige handelsmerke raak te sien. Die Sig Sauer se beeld is glashelder – meer as goed genoeg vir alle jagomstandighede in Suid-Afrika.
Ek was beïndruk met hierdie model wat teen ongeveer R16 000 tot R17 000 plaaslik behoort te verkoop. Ongelukkig kon ons die teleskoop net op die skietbaan toets.
Sig Sauer bied afstandmeters in verskeie modelle aan. Sommiges is meer bedoel vir gebruik »
» deur boogjagters en ander wat nie nodig het om bokke op lang afstande te meet nie. Die topmodelle van Sig Sauer staan glad nie terug vir die bekende Europese produkte nie.
L&O het ons gevra om die 4x20 Kilo850-afstandmeter tydens ’n Oos-Kaapse jag te toets. Hierdie klein, sakpasgrootte afstandmeter is Sig Sauer se intreemodel en kan volgens die vervaardiger onder ideale omstandighede groot weerkaatsen- de teikens tot op 1 200m meet. Normaalweg is die reikafstand egter sowat 800m vir groot voorwerpe en 600m vir blesbokgrootte bokke.
Soos met die meeste afstandmeters kan jy kies tussen meter en jaart as meeteenheid. Die Kilo850 kan ook vir jou beide die AMR-afstand (angle modified range) en die LOS-afstand (line of sight) gee. Eersgenoemde is die horisontale afstand na die teiken en laasgenoemde die werklike afstand ongeag die hoek waarteen jy kyk/meet. Die AMR-afstand is dus altyd korter en dui die afstand aan wat jy in aanmerking moet neem vir jou kaliber/koeël/ladingkombinasie se trajek. Die brosjure wat met elke afstandmeter voorsien word verduidelik mooi hoe om die verskillende modusse te kies. Afstandmeters word voorsien met die AMR-afstand vooropgestel.
Jy kan ook kies tussen BESTof LAST-teiken. Waar jy deur bosse of gras die afstand wil meet, sal jy die LAST-opsie kies – die afstandmeter meet dan die laaste of verste voorwerp wat die laser tref en dui dit aan.
Tydens my veldtoets het ek gevind dat die Kilo850 van so naby as 4.5m kan meet maar dat die vervaardiger se aansprake van 1 200m ’n bietjie optimisties is. Volgens die brosjure behoort jy bome te kan meet tot op 800m, maar ek het gevind dat die Kilo se bene lam raak hier by 600m op bome. Blesbokke kon ons meet tot so amper 500m.
Vir my, wat selde skote verder as 300m neem, is die Kilo850 dus meer as voldoende, maar mense wat langer afstande wil meet, sal gefrustreerd raak. Hou egter in gedagte dat die Kilo850 ’n intreevlakmodel is wat minder as R4 000 kos. Met optiese produkte kry jy waarvoor jy betaal. Ek het die afstandmetertjie baie geniet en dit het uitstekend gewerk op twee jagtogte waartydens ons bosbokke, blesbokke en rooibokke geskiet het. Teen die prys wat jy vir die Kilo850 betaal, dink ek werklik hierdie klein, ligte afstandmeter is uitstekende waarde vir geld.
Sauer-gewere en Sig Sauer optiese produkte word landwyd verkoop. Indien jou gunstelinghandelaar nie die produkte aanhou nie, vra homo m die agente, die L&O-groep in Pretoria te kontak.