In die kol ’n Biltongkerwer vir fynproewers
SA JAGTER/HUNTER het onlangs die geleentheid gehad om een van Tom Wostenholm se bobaas-biltongkerwers te gebruik en te beoordeel.
Soos lesers op die foto kan sien, bestaan dié biltongkerwers uit ’n groterige gemonteerde lem en ’n voetstuk of basis van hout. Tom, wat al ses jaar lank biltongkerwers maak, doen al die werk self met die hand. Hy maak nie net al die onderdele nie, maar ook die verskillende voetstukke vir sy biltongkerwers. Die lemgrootte en staal van al die ontwerpe is dieselfde, dis net die voetstukke wat verskil. Hoewel hy hoofsaaklik oondgedroogde swarthout gebruik (dit trek nie krom nie) werk hy wel soms met ander soorte hout. Olienhout kan nogal mooi basisse oplewer as jy die regte stuk hout in die hande kry.
Daar is baie biltongkerwers in die mark, maar sommige van hulle rook nie die pyp as dit kom by werkverrigting nie. Tom Wostenholm se biltongkerwers is gewaarborg om jare lank hard te werk. Hy het al oor die 3 000 biltongkerwers verkoop en tot dusver is slegs een kerwer teruggestuur vir onderhoud.
Die lemme word van vlekvrye staalallooi gemaak wat
4.5mm dik is. Tom slyp ook self die hoek van die lemme en pas so ’n paar “geheime” toe wat maak dat die kerflem deur biltong glip soos ’n warm mes deur botter. Volgens Tom kan een lem maklik ’n halfton biltong kerf. Die lem se kurwe is van so ’n aard dat nat biltong baie dun gesny kan word. Hierdie ker- wers het egter vele gebruike en is nie net tot biltongkerf beperk nie. Dit kan in die kombuis gebruik word om tjop-tjop groente op te kerf, leer te sny, asook papier en karton en ook cable ties.
Tom maak verskillende basisvorms, van ’n basiese een tot vorms met integrale of los bakkies vir die biltong.
Dan ets hy ook dieremotiewe op die lem, deur middel van ’n chemiese proses, alles volgens die kliënt se behoeftes. Enige naam, handelsmerk of kenteken kan op die lem aangebring word. Pryse wissel van R750 tot so R3 500. Let wel dat, ongeag die prys van die kerwer, die lemme van dieselfde gehalte en grootte is.
Ons het Tom se biltongkerwer op die proef gestel en kan in alle eerlikheid sê dat dit van hoogstaande gehalte is. Dit kerf harde, sagte en nat biltong ewe goed. Ons het ook Tom se aansprake dat die kerwer ander materiale en groente kan kerf getoets en gevind dat dit nie sommer bekpraatjies is nie. Hierdie biltongkerwer kán beslis meerdoelig aangewend word en die gehalte is sodanig dat ons glo dit jare se swaardienswerk sonder probleme sal lewer.
Tom glo dat daar wel mense is wat dalk net sulke goeie kerwers kan maak soos hy, maar hy is oortuig niemand kan ’n beter biltongkerwer maak nie. Ons is nogal geneig om Tom te glo! Die lemme van die biltongkerwers word lewenslank gewaarborg.
Tom het aan ons genoem dat hy normaalweg ’n paar kerwers in voorraad het. Na bestelling neem dit ongeveer ’n week voor versending plaasvind. Vanaf Septembermaand elke jaar begin die bestellings egter instroom vir die Kersseisoen en dan kan dit langer neem om bestellings af te handel. Indien jy dus in so ’n biltongkerwer belangstel, plaas maar daardie bestelling vroegtydig.
Nadat ons hierdie biltongkerwer vir ’n maand lank vir biltongkerf en ander werkies gebruik het, kan ons dit met groot vrymoedigheid aanbeveel. Dit is voorwaar ’n produk geskik vir die fynproewer. * Bestel by timberstom@gmail. com of skakel 082-960-2843. Tom sal met graagte ’n pryslys met foto’s aanstuur.