’n Beter greep
As jy ’n geweer vinnig wil oorhaal, is dit noodsaaklik dat jy nie moet rondtas na die grendelhefboom of grendel- knop nie. Alhoewel die grendelknoppe van die meeste gewere groot genoeg is om maklik te hanteer, is hulle tog na sommiges se mening net daardie klein bietjie té klein. Dis eenvoudig ’n feit dat groter grendelknoppe makliker en vinniger hanteer. Dit lyk natuurlik glad nie so mooi soos die elegantes wat veral by spoggewere in die klassieke styl aangetref word nie en dis een rede waarom sommige mense hulle vermy.
Die oplossing is ’n vinnig-verwyderbare grendelknop wat jou toelaat om met jou geweer te spog wanneer jy wil. In Europa is grendelknoppe van rubber gewild en Derek Ingenbleek van Pretoria het ’n groot klomp daarvan ingevoer. Hierdie swart grendelknoppe word bloot oor die bestaande grendelknop geglip (’n bietjie olie op die geweer se grendelknop maak dit maklik) en kan weer ewe maklik afgehaal word. Ons redakteur, Koos Barnard, het sulke grendelknoppe op die meeste van sy gewere en beveel dit met groot vrymoedigheid aan. As jy eers een maal so ’n grendelknop gebruik het, sal jy die praktiese waarde daarvan insien. * Om van hierdie handige rubbergrendelknoppe te bestel, wat R100 stuk kos (posgeld uitgesluit), kontak vir Derek Ingenbleek van Pretoria by 082653-8283.