DRA JOU GEWEER GEMAKLIK
Jagters wat gereeld te voet jag, sal weet dat ’n gemaklike draband of geweerbelt die jagervaring baie lekkerder maak. Daar is niks so frustrerend as om die hele tyd met jou geweer te moet stoei terwyl jy stap nie. Dis veral effense swaar gewere wat ’n lekker breë maar gemaklike belt vereis.
Swannie Swanepoel van Bethlehem in die Vrystaat maak sulke belde van egte leer. Dis ’n sagte belt wat bestaan uit ’n hele aantal “skakels”. Ons het dit in die jagveld getoets en gevind dat dit jou in staat stel om die geweer baie gemaklik te dra. Die belde word voorsien in vasgestelde lengtes en kan nie verstel nie, tensy jy van die skakels uithaal. Dis nie ’n groot probleem nie, want die meeste stapjagters gebruik geweerbelde slegs om die geweer te dra.
Hierdie geweerbelde verkoop teen slegs R350 (posgeld uitgesluit) wat ’n ware winskoop is. * Vir meer besonderhede of om te bestel kontak vir Swannie by 084-583-9781.