Hinterland/SAJWV Nasionale Intertak Spankompetisie 2017
Die Vrystaat Sandveldtak het die Nasionale Presidentskiet- en Intertak Spanskietkompetisie reeds by ses geleenthede baie suksesvol aangebied.
Dit het duidelik geword dat die aanbieding van die groot nasionale skietkompetisies op hierdie sentraal-geleë skietbaan in die Vrystaat beslis bydra tot die sukses van die groter bywoningsyfer deur skuts. Weens die sentrale ligging van hierdie skietbaan is meer mense bereid om soontoe te reis, want dit hou ook die reis- en verblyfkoste laer.
Bogenoemde faktore het daartoe bygedra dat SA Jagters se Raad ongeveer 18 maande gelede besluit het om die Vrystaat Sandveldskietbaan te ontwikkel in een wat nasionale SA Jagters- skietkompetisies kan aanbied. Vroeg in 2015 het die Vrystaat Sandveldtak na ’n nuwe terrein begin soek vir ’n skietbaan aangesien die bestaande skietbaan op die plaas Wintersdam (in die berugte soutpan!) nie meer beskikbaar was nie. ’n Geskikte terrein is gevind op die plaas Middelkop ongeveer 20km vanaf die dorpie Soutpan op pad na Bultfontein en daar is dade- lik begin met die uitleg van die nuwe skietbaan. Daar is voorsiening gemaak in die beplanning vir ’n 300m-baan met 50 skietpunte wat groot genoeg sou wees vir nasionale skietkompetisies. Verdere beplanning het voorsiening gemaak (in fases) vir ’n 100m-inskietbaan, ’n 50m-skietbaan en die bou van ’n klubhuis.
Vrystaat Sandveldtak het die aanvanklike ontwikkeling grootliks self befonds en met borgskappe, die tak se eie finansies en die persoonlike tyd van individue is ongeveer R250 000 reeds spandeer voor die eerste hulp by Inyathipark aangevra is – dit deur ’n plattelandse tak met slegs ongeveer 270 lede. Merkwaardig! Die beginselbesluit is daarna deur die Raad geneem om die Vrystaat Sandveldtak finansieel by te staan met verdere ontwikkeling. ’n Begroting is opgestel en goedgekeur deur die Raad en met Danie Steyn (die voorsitter van die Vrystaat Sandveldtak) as projekbestuurder is die klubhuis van 420m² gebou en die werk op die res van die skietbaan in Julie 2017 voltooi.
INTERTAKKOMPETISIE
Op Saterdag, 12 Augustus 2017 het die Vrystaat Sandveldtak die nasionale SA Jagters Intertak Spanskietkompetisie op die Meerkatgatskietbaan, met sy splinternuwe klubhuis aangebied – die tweede nasionale skietkompetisie op dié nuwe terrein. Die weer het baie mooi saamgespeel en dit was ’n heerlike sonnige dag met slegs matige wind. Die weer kon dus nie die skuld kry vir swak skote nie! Skuts en ander besoekers was dit eens dat die nuwe klubhuis ’n pragtige toevoeging tot die skietbaan is.
Baie geluk en baie dankie aan die Vrystaat Sandveldtak vir hul poging. Hulle gasvryheid, aandag aan detail en die diens van die professionele baanoffisiere onder leiding van die hoofbaanoffisier, Basie Berg (streekkoördineerder van die Vrystaat), die vriendelike administratiewe personeel en die afsluiting met
’n heerlike ete en prysuitdeling was iets besonders! Basie Berg is besig om vir homself naam te maak as hoofbaanoffisier. Hy verseker met sy baie gemaklike en vriendelike styl dat alle reëlings glad op die skietbaan verloop. Baie dankie Basie, die skuts waardeer dit!
Gedurende 2017 het 202 spanne op streekvlak gekompeteer om as een van die Top 30spanne na die nasionale Intertak Spanskietkompetisie genooi te word. Net 50 skuts kan per aflossing deelneem en daarom is die 150 skuts (30 spanne van 5 skuts elk) in drie aflossings opgedeel. Aflossing 1 se 50 skuts het aangetree en die dag afgeskop met die 3 skote vanaf 300m op die springbokteiken. Daarna het hul teruggestaan en aflossing 2 het hul beurt gekry en daarna aflossing 3. Toe het die skuts na die 200m-skietpunt beweeg waar elke aflossing weer om die beurt hul skote geskiet het. So het elke aflossings die geleentheid gekry om onder min of meer dieselfde weerstoestande (temperatuur, mirage en wind) te skiet.
Na voltooiing van die vlakteskietoefening was daar ’n kort pouse waarin die baanoffisiere ’n ruskans gekry het en toe is die bosveldskietoefening gedoen. Die laaste skote het hier teen 14h30 geklap.
Hierdie skietbaan is in ’n pragtige omgewing geleë en elke skut met wie ek gesels het, het bevestig dat dit ’n heerlike voorreg is om daar te kan skiet, al moes van die skuts ver reis. Die Vrystaat Sandveldtak kan met reg baie trots wees op hulle nuwe skietbaan en klubhuis en ’n nasionale Intertak Spanskietkompetisie wat ’n nuwe standaard gestel het.
Baie geluk aan Pretoria-Oos se Swartwitpensspan wat die kompetisie gewen het – hulle het soos ware kampioene geskiet en almal uitgestof. Die vyf skuts het elkeen ’n R3 000-geskenkbewys van Hinterland ont- vang. Baviaanspoort se Buffelspan het die tweede prys gewen (’n Hinterland-geskenkbewys van R2 000 vir elke spanlid) met Bloemfontein se A-span in die derde plek. Elkeen het ’n R1 000-geskenkbewys van Hinterland ontvang.
Baie dankie aan ons hoofborge, die Hinterlandgroep vir die ruim borgskap van R30 000 aan die eerste drie spanne en aan Gerhard van der Ryst en Albert Neethling van Hinterland Bultfontein wat die skietkompetisie bygewoon het. Die Hinterlandgroep verteenwoordig die samesmelting van Afgri en Senwes Koöperasie en hulle het reeds agt wapenafdelings in hul bestaande winkels in die Vrystaat, Noordwes, KwaZuluNatal en Gauteng (en dié getal wapenafdelings gaan binnekort met nog vier of vyf uitgebrei word).