Hoe om QuickLOAD te gebruik Deel I I
In hierdie artikel gaan ons voort met die neem van metings vir QuickLOAD.
1. DOPVOLUME
Water se volume en gewig is direk verwant, 1 liter water weeg 1kg. As ons dus weeg hoeveel grein water ’n dop neem, bepaal ons daarmee daardie dop se beskikbare volume.
Die maksimum beskikbare dopvolume word vir ’n gevuurde dop gemeet, met die slagdop steeds in plek. Omdat die gevuurde dop die naaste aan die werklike kamergrootte is, word dopvolume gemeet voor enige hervorming of ander werk aan die dop gedoen is.
Dit is net baie makliker om te weeg met ’n elektroniese skaal as met ’n balkie-skaal. Foto 1 toon die toerusting wat ons benodig om dopvolume te meet: ’n elektroniese skaal, ’n inspuiting met naald en ’n bakkie met water. Deur ’n druppel of twee skottelgoedseep by die water te voeg, word die oppervlakspanning verminder en vorm die miniskus meer konstant.
Die droë, leë dop (soos geskiet) weeg in my geval 178.9gr.
Trek ’n inspuiting vol water. Heg ’n naald aan om te verhoed dat lugborrels binne die dop vorm en agterbly tydens die inspuit van die water. Verwyder alle lug uit die spuit. Spuit die water stadig in die dop, tot byna vol. Maak die dop vol deur versigtig met die spuitnaald druppels by te voeg.
Vul die doppe altyd eenders. Beheer dit deur die vorm van die miniskus konstant te hou soos in foto 2 aangetoon word. Die dop vol water weeg 234.5gr.
Bereken die maksimum beskikbare dopvolume deur die leë dopmassa van die vol dopmassa af te trek, 234.5 – 178.9 = 55.6gr in hierdie geval. Meet so vyf doppe en gebruik die gemiddeld.
2. DOPSNYLENGTE
Nadat ons die doppe hervorm en voorberei het vir herlaai, sny (trim) ons gewoonlik die doppe se lengtes volgens spesifikasie. Die maksimum doplengte-spesifikasie vir my .308 Win is 51.18mm (2.015 duim), daarom sny ek my doplengte effe korter na 51.00mm.
Meet die doplengte met ’n skuifpasser vanaf die dop se kop tot by die dop se bek, terwyl die dop liggies gewikkel word om te bevestig dat dit mooi haaks tussen die twee kake pas. Sien foto 3. Gebruik hierdie dopsnylengte in QuickLOAD.
3. KOEËLMATES
Meet met jou skuifpasser die totale koeëllengte vanaf die koeël se basis tot by sy voorpunt asook die bootstert se lengte soos in foto 4.
Ons sal later hierdie afmetings met dié van QuickLOAD vergelyk om te bevestig dat ons wel die korrekte koeël in QuickLOAD gekies het.
4. INVOER VAN PATROON- EN GEWEERINLIGTING
Voer jou geweer en patroon se inligting in blok 1, in die Cartridge Dimensions- blok in, sien foto 5 aan linkerkant. 4.1 Kies jou kaliber Kies dan die geweerkaliber by Selected Cartridge, aangedui deur A in foto 5.
➪ Bevestig dat QuickLOAD se
standaard-geweerkaliberdata regs van Selected Cartridge vertoon. Dit moet File:qloadfw vertoon. (Indien nie, klik op File: qloadfw, skuif na en kies die qloadfw.vol- datastel.)
Daar is twee datastelle vir kaliber beskikbaar. Die qloadfw. vol file is in Engels, en gebaseer op SAAMI- en CIP-spesifikasies. Dit is die twee groot beheerliggame van wapen- en ammunisieverwante spesifikasies. SAAMI is hoofsaaklik Amerikaans en CIP Europees. Hulle gebruik verskillende metodes om die maksimum toelaatbare kamerdruk te meet. Dus verskil hulle spesifikasies hieroor en is dit dan ook die grootste onderskeid tussen SAAMI en CIP in QuickLOAD. CIP se maksimum kamerdruk is gewoonlik effe laer as dié van SAAMI. Daar is dikwels die keuse tussen SAAMI of CIP per kaliber. Die algemeen aanvaarde standaard in Suid-Afrika is CIP, maar jy is welkom om SAAMI te gebruik.
Die ander datastel, SAMEREIR.vol, lyk na ’n baie beperkte Duitse spesifikasie waarmee ek nie gemaklik voel nie. Klik op die grys af-pyltjie; Skuif na en klik op .308 Win (CIP). 4.2 Koeëlvervaardigerkeuse Kies volgende die koeëlvervaardiger by Selected Bullet, aangedui deur B in foto 6. Klik op File:/ Nolser; Skuif na en klik op .308 Win (CIP).
Kies die spesifieke koeël by Selected Bullet, aangedui deur B in foto 7. ➪ In QuickLOAD 3.8 en later kan jy ook op die geel logo klik om die koeëlvervaardiger te kies. Sodra jy op OK klik, verskyn die koeëlkeusetabel:
Skuif na en klik op die .308, 155, Nosler CC HPBT J4 53155koeël.
In die volgende artikel gaan ons voort met die neem van metings vir QuickLOAD. Lekker skiet! * Kontak Cassie via sy webblad www.mamba-reloading.co.za/