SNIPER 4 LIFE SE WENNERS
In die Julie-uitgawe van SA JAGTER/HUNTER het ons berig oor die Sniper 4 Life-kompetisie wat deur Sniper Africa geloods is om erkenning te gee aan lojale kliënte van Sniper Africa. Die jagervaring van ’n leeftyd (Hunt of a lifetime) is as prys aangebied aan ’n gelukkige jagter en twee vriende. Die jagpakket sluit ’n buffelbul, njalabul, koedoebul en drie rooibokramme in.
Op 10 Augustus 2017 is die finale trekking vir hierdie kompetisie by The Rooftop Café in Rosebank gehou. Adriaan Woudstra (van HuntEx-faam) het die trekking behartig. Die gelukkige wenner is Mercia van Vuuren van Kempton Park. Sy het ingeskryf tydens HuntEx wat in April vanjaar by Gallagher Estate in Midrand gehou is. Haar man, Anton, is die gelukkige jagter en sal haar vergesel tydens die jagtog. (Sy het ingeskryf met die doel om die jag vir hom te wen!) Baie geluk, Anton en Mercia!
’n Professionele rolprentspan sal die jagters vergesel om die jagervaring op film vas te lê. Hulle word ook tydens die jagtog voorsien van Sniper-kamoefleerdrag en -toerusting. Die totale waarde van die prys is dus aansienlik meer as R150 000. Die jag sal op die plaas Rietfontein in die Zeerust-distrik plaasvind en word deur Green South Safaris aangebied. Sniper Africa en James Hill van Rietfontein het op die nippertjie besluit om ook troospryse vir die ander vier finaliste beskikbaar te stel. ’n Blouwildebees en nog rooibokke is as troospryse aangebied.