Aim vir beter skiet

Bybehore wat jou skietervaring makliker en ook meer aangenaam maak, is deesdae oral beskikbaar. Ek het tydens die HuntEx-skou by Gallagher Convention Centre by Nico Harrishulle se stalletjie ’n draai gemaak en daar van hulle Aimprodukte besigtig. Ek is daar weg met ’n Aim-hefboomknop (bolt-knob) vir die slot van my .30-06 Remington-geweer, asook ’n Aim Monopod wat jy as ’n agterste rus kan gebruik nadat jy dit aan die kolf vasgeskroef het.

Ek het hierdie twee produkte oor die afgelope paar maande gebruik en kan net met lof van hulle praat. Die hefboomknop »

» bestaan uit twee dele wat bloot oor die bestaande knop van die slothandvatsel pas en dan vasgedraai word. Die groter greep van die hefboomknop maak dit net soveel makliker om die geweer oor te haal, veral as jy vinnig moet skiet. En wil jy met jou geweer spog, kan jy bloot die hefboomknop afskroef om weer die oorspronklike handvatsel te vertoon. Behalwe dat hierdie twee produkte uiters goed werk, is hulle ook billik geprys.

Nico-hulle maak ook Aim-geweerkolwe van sintetiese materiaal en soos julle op meegaande foto kan sien, is dit van die taktiese soort waarvan die wangstukke asook die skopkussings verstelbaar is. Hierdie kolwe is ontsettend sterk – ek het die marteltoetse gesien waaraan hierdie kolwe onderwerp word en dis indrukwekkend om te sien wat hulle kan weerstaan. Op die oomblik is hierdie kolwe nog net vir Howa-kortaksies beskikbaar, maar die reeks sal verder uitgebrei word. Nico-hulle bemark ook knaldemperkouse en trompremme. * Vir meer besonderhede oor al hul Aimen ander produkte, kontak Nico Harris by 082-305-0743.

Aim-kolwe is tans beskikbaar vir kortaksiegewere van Howa. Die plan is om die reeks later uit te brei. Let op dat die wangstukke en skopkussings verstelbaar is. Hierdie kolwe kos R6 900 stuk.

LINKS: Die knaldemperkouse verkoop teen R450 stuk. ONDER: Trompremme verminder terugskop en is maklik om aan ‘n geweer te pas. Die prys van hierdies is R1 800.

Op die foto links is die Aim Pod wat as agterste rus op ‘n geweer gebruik kan word en regs word die hefboomknop wat aan die slot se hefboomhandvatsel geskroef word, gewys. Beide produkte werk uitstekend. Die Aim Pod kos R780 en die hefboomknop R450.