Norma, Blaser en Sig Sauer: ’n Wenkombinasie
Norma Precision AB en Norma-produkte is goed onder SuidAfrikaners bekend. Hierdie Sweedse maatskappy vervaardig hoëkwaliteit-geweerdoppe en -koeëls asook jag- en skyfskietammunisie.
Een van die plaaslike verspreiders van Norma-produkte is L&O van Pretoria en hulle het ons onlangs genooi om Norma se Diamond Line-ammunisie in .308 Win te toets. Hierdie ammunisie word gelaai met Sierra se 168gr HPBT-koeël wat ’n BC van .470 het. Volgens Norma se statistiek is die ammunisie gelaai vir ’n koeëlsnelheid van 2 549vps uit ’n 24”-loop.
DRIE PRODUKTE
L&O, wat ook die verspreiders van Blaser-gewere en Sig Sauerteleskope is, het ’n Blaser R8 met ’n sintetiese kolf voorsien wat toegerus was met ’n 5-30x56 Sig Sauer Tango 6-teleskoop. Dié teleskoop se kruishaar (met addisionele afmikmerkies) is in die eerste fokale area aange- bring wat meebring dat die kruishaar “groei” soos die vergroting hoër gestel word. In werklikheid bly die kruishaar se afmetings dieselfde relatief tot die grootte van die teiken, wat beteken dat jy die afmikmerkies kan gebruik teen enige vergroting sonder om die koeëls se trefpunte op verskillende afstande te beïnvloed.
Hierdie teleskoop met sy taktiese-tipe verstelknoppe en spesiale kruishaar is uiters geskik vir langafstandskiet. Wat dié bul-teleskoop besonders maak, is die ingeboude waterpas in die sigveld. Kantel jy die geweer, gaan daar ’n oranjekleurige liggie op die regter- of linkerpunt van die horisontale been van die kruishaar aan. As die geweer regop gehou word, is die liggies af. Vir my is dit een van die heel beste eienskappe wat in ’n langafstandskiet-teleskoop gebou kan word. Ek sukkel om die normale waterpassies ( bubble levels) wat op teleskoopringe vasmaak, lekker te sien en gebruik hulle nie. Op die Sig Sauer Tango 6-teleskoop het jy die keuse om hierdie funksie (waarvan die skakelaar op die parallaks-stelknop geleë is) te aktiveer of nie.
Die Blaser R8 is, soos almal weet, een van die vlagskip-gewere wat deesdae op die wêreldmark beskikbaar is. Alhoewel puriste sê dat dié gewere te modern na hulle sin lyk en funksioneer, kan niemand die kwaliteit en die akkuraatheid van die Blasers bevraagteken nie. Die ontwerp van die aksie en snellermeganisme maak hierdie gewere ook lekker kompak, ’n eienskap wat veral in bosveldtoestande handig te pas kom.
Die geweer waarmee ons die Norma-ammunisie getoets het, was voorsien van ’n duimgatkolf wat ook nie almal se gunsteling is nie. Ek besit tans drie gewere met duimgatkolwe en vir my werk hierdie tipe kolwe uitstekend. Die kolf van die Blaser is uiters gemaklik om te gebruik veral uit die staan- en lêposisies.
DIE TOETS
Norma se Diamond Line-ammunisie het oor die jare ’n baie goeie reputasie in skyfskietkringe opgebou en ek was nuuskierig om te sien hoe dié ammunisie uit die Blaser sou vaar. Ons het op ’n baie warm Oktoberoggend afgesit na die Premier-skietbaan naby Cullinan om die toetsprodukte deur hul passies te sit.
Die teleskoop se verstellings was akkuraat en herhaalbaar en die lekker groot vinger-verstelbare knoppe het dit maklik gemaak om die nodige verstellings te doen. Om die kruishaar te stel moet die stelknop opgelig word, wat die sluitmeganisme dan ontsluit, waarna die knop gedraai kan word. Dis ’n goeie funksie wat verhoed dat die verstelling per abuis verander word as die teleskoop teen iets kap of skuur.
Wat beeldhelderheid betref, is die Sig Sauer nog nie heeltemal in dieselfde klas as die baie duur Europese produkte nie, maar vir Suid-Afrikaanse omstandighede is die optiese kwaliteit meer as voldoende. Teen 30x-vergroting het die Sig wel ’n bietjie teleurgestel, maar my ondervinding is dat selfs die duurste Europese teleskope teen daardie vergroting tekort skiet.
Wat die ammunisie betref, was ons hoogs beïndruk. Om te voorkom dat die mirage (lugspieëling) ’n rol speel, het ons so gou as moontlik ’n drieskootgroepering op 100m geskiet en tot my vreugde het die skote almal mekaar gesny en ’n piepklein groepering van skaars 5mm gemaak. Dit was uitsonderlik. Ons het gou-gou ook groeperings met drie ander gewere geskiet om die mirage te probeer fnuik. Toe ons weer by die .308 uitkom, het die mirage intussen dramaties opgetel en dinge baie moeilik gemaak. Ons het nog twee drieskootgroeperings geskiet, maar kon nie die eerste groep se grootte ewenaar nie. Beide hierdie groepe het egter rondom 15mm gemeet.
Ek het ook vyf Normas op 100m deur my eie geweer, ’n CZ 550 met ’n 26”-loop geskiet. My geweer het nie so baie van die Normas gehou nie en die vyfskootgroepering het 27mm gemeet, maar ek moet weereens beklemtoon dat die skote in erge mirage geskiet is. Waar Norma op ’n koeëlsnelheid van 2 549vps aanspraak maak uit ’n 24”-loop, het ons slegs 2 471vps vir vyf skote uit die Blaser gemeet. Die ekstreme spoedverspreiding van die vyf skote was 14vps. Uit my geweer met die 26”-loop het die vyf skote ’n gemiddelde snelheid van 2 500vps (2 499.6 om presies te wees) aangeteken. In dié geweer se geval was die ekstreme spoedverspreiding 36vps.
Ons het ongelukkig slegs een pakkie van 20 patrone ontvang en dus kon ons nie die ammunisie op langer afstande toets nie. Na ons 100m-toetse was daar net ses patrone oor en ons het hulle toe op 200m geskiet. Die mirage het dit egter onmoontlik gemaak om enige sinvolle akkuraatheidstoetse te doen. Die beste van die twee drieskootgroeperings wat ek geskiet het, het 45mm gemeet. Dit was beslis heel aanvaarbaar, in ag genome die swak toestande.
DIE AANBEVELING
Alhoewel ons slegs beperkte toetse met die Norma-ammunisie kon doen, voel ek tog dat ek die ammunisie met groot vrymoedigheid kan aanbeveel. Dit het beslis baie akkuraat uit die Blaser geskiet en selfs met ’n 27mm-groe- pering uit my CZ 550 is ek bereid om 20cm-ghongs tot op 350m met ’n geruste hart aan te vat.
Vir my is die integrale waterpas in die Sig Sauer Tango 6teleskoop só ’n goeie funksie dat ek die teleskoop net daarvoor sal wil koop. Ek is geneig om my gewere na links te kantel as ek skiet, dus sal so ’n ingeboude waterpas baie handig wees.
Oor die Blaser kan ek natuurlik nie uitgepraat raak nie. Soos ek ook in die artikel oor L&O se ghongskiet genoem het; ek sal beslis in die toekoms vir my ’n Blaser wil aanskaf. Hierdie gewere se akkuraatheid, lekker hantering en uitstekende snellers maak van hulle wenners in my oë. * Blaser-gewere, Sig Sauer-teleskope en Norma-produkte is landwyd beskikbaar by wapenhandelaars.
Alhoewel ons slegs beperkte toetse met die Normaammunisie kon doen, voel ek tog dat ek die ammunisie met groot vrymoedigheid kan aanbeveel.