Vortex Razor HD AMG
Langafstandskiet is deesdae ’n baie gewilde dissipline in die skietwêreld en daarvoor moet jy nie net die regte geweer hê nie, maar ook die regte toerusting. ’n Toepaslike teleskoop is van kardinale belang. Dis immers die visier waarmee jy mik om die koeël en teiken by mekaar uit te bring.
Vortex het geen bekendstelling in Suid-Afrika nodig nie. Hierdie teleskope wat plaaslik deur Whylo van Durban versprei word, is al etlike jare lank hier beskikbaar en het goed naam gemaak vir hulself.
Een van die modelle wat uiters geskik is vir langafstandskiet is die 6-24x50 FFP Razor HD AMG wat Vortex se vlagskip is wat die sogenaamde “taktiese” teleskope betref. Daar is verseker ’n groot aantal doodgewone teleskoopmodelle wat ook baie goed aangewend kan word as jy teikens op langer afstande wil aandurf, maar ’n doelgeboude teleskoop maak dinge net makliker en die skietervaring meer aangenaam.
Die AMG is volgens die vervaardiger die ligste teleskoop in sy klas met die volle spektrum van kenmerke wat ’n goeie langafstandteleskoop moet hê. Terloops, anders as sommige van die ander Vortex-modelle word die AMG in Amerika vervaardig. Vir sommige langafstandtoepassings is die teenwoordigheid van gewig nie ’n groot faktor nie, maar diegene wat langafstandjag beoefen, word soms wel genoodsaak om hul gewere ver ente te dra en dis dan wanneer jy dankbaar is vir elke gram gewig wat jy kan bespaar.
Die relatief ligte gewig veroorsaak glad nie dat die AMG duursaamheid inboet nie – hierdie teleskoop is stewig gebou en sal ’n groot klomp stampe en stote kan hanteer.
Soos te verwagte, is die optiese kwaliteit baie goed en vergelyk dit uitstekend met die helderheid van die meeste Europees-vervaardigde produkte. As jy nie jou teiken met ’n Razor AMG kan identifiseer nie, is daar fout met jou oë, beslis nie met die lense van die AMG nie.
AMG-teleskope word toegerus met Vortex se EBR-7 MRAD of MOA-kruishaar wat ’n magdom afmikmerkies het vir afstand en wind. Die MRAD en MOA beteken bloot dat die kruishaar-afmetings en die stelvermoë van die verskillende modelle in MOA- of MRADverstellings werk. MRAD-modelle stel 0.1 MRAD vir elke klikkie (dis 1cm op 100m) terwyl die MOA-modelle ’n ¼” op 100 jaarts stel vir elke klikkie (op 100m is dit 7.2mm).
Die EBR-7-kruishaar word op ’n glaslens geëts en kan dus nie breek nie. Omdat die kruishaar ook in die eerste fokus-area aangebring is, bly dit altyd dieselfde grootte relatief tot die teiken, maak nie saak op watter vergroting die teleskoop gestel word nie. Vir die menslike oog lyk dit natuurlik of die kruishaar al dikker raak as die vergroting verhoog word en dunner as die vergroting verlaag word. Dis die een nadeel van kruishare wat in die eerste fokus-area geplaas word. Teen lae vergroting vertoon die kruishaar so fyn dat dit amper nie sigbaar is nie, veral as die agtergrond besig is.
Sommige mense hou nie van hierdie tipe kruishare nie, maar dis uiters handig dat jy die afmikmerkies kan gebruik op verskillende vergrotings sonder dat die trefpunt van die koeël (jou instelafstande of zero) beïnvloed word.
Ons toetsmodel se verstellings het in MRAD gewerk, ’n tipe verstelling wat vir sommige kompetisieskuts dalk te grof is, maar vir jag en die ghongskietkompetisies wat vir langafstandskuts aangebied word, is so ’n verstelling voldoende.
Nog iets wat opgeval het, is dat die oogstuk se fokus nie van die vinnige verstelbare-tipe is nie. Die oogstuk het ’n sluitring wat, nadat die fokus gestel is, vasgedraai moet word om die posisie van die oogstuk te sluit (ouer teleskoopmodelle was almal met sulke oogstukke toegerus). Dit verhoed dat die oogstuk per abuis gedraai word tydens vervoer of gebruik. Die uitgangspunt met die gebruik van hierdie tipe oogstuk is dat skuts hul nie gedurig hoef te bekommer oor die fokus nie – eens gefokus sal dit altyd korrek wees.
Terug na die verstellings. Die versteldromme of -knoppe is groot en vinger-verstelbaar. Soos gebruiklik is daar ’n stelknop vir parallaks (vanaf 25 jaarts tot oneindig) aan die linkerkant en dit bevat ook die integrale aan/af-meganisme vir die verligting van die kruishaar. Die stelknoppe het almal ’n sluitmeganisme om te verhoed dat verstellings per abuis gedoen word. Om verstelling te bewerkstellig moet die stelknoppe eers gelig (opgetrek) word, waarna dit dan kan draai. Na die verstelling word die stelknop weer afgedruk sodat dit in plek sluit. Dieselfde geld vir die kruishaar se verligting – daar is 10 verstellings vir helderheid en tussen elke verstelling is daar ’n “af”posisie. Die hele kruisdraad verlig wanneer die verligting aangeskakel word.
Die stelknop vir hoogte het ook ’n verdere sluitmeganisme ( zero stop) wat gebruik kan
word om te verhoed dat die stelknop verby die oorspronklike instel-afstand gedraai word. Wil jy na jou oorspronklike instelafstand terugkeer, hoef jy nie klikkies te tel nie, jy draai bloot die knop tot dit vassteek.
Ek het die AMG op my .30-06 gemonteer vir ’n skietbaantoets. Ongelukkig kon ons dit net op ’n 300m-baan gebruik, maar dit het ons darem in staat gestel om die werking van die teleskoop te toets.
Een ding wat van die EBR-7 opval, is dat dit ’n baie besige kruishaar is wat nie ideaal is vir normale jaggebruik nie. Hierdie is beslis ’n kruishaar waaraan jy gewoond moet raak. Jy sal ook baanwerk moet doen om die kruishaar vir wind en afstand te kalibreer. Toepassings soos Strelok en vele ander is egter beskikbaar waarmee skuts kan werk om sodoende maklike verwysings en verstellings te bepaal vir elke moontlike kaliber op die mark.
Vir langafstandskiet moet ’n teleskoop akkuraat en herhaalbaar kan verstel anders is dit nutteloos. Langafstandskuts draai daardie verstelknoppe dat hulle soos kastanjette raas. Alhoewel sommige skuts die afmikmerkies gebruik, is dit algemene gebruik dat jy eerder vir afstand en wind stel as om af te mik. Die belangrikheid van akkurate en herhaalbare verstellings is dus van kardinale belang. Met die toetsmodel het ons gevind dat die AMG inderdaad baie akkuraat stel.
Op 6x-vergroting is die kruisdraad natuurlik heeltemal te fyn om te gebruik, maar langafstandskuts gebruik nooit of bykans nooit so ’n lae vergroting nie. ’n Mens kan met redelike vertroue aanneem dat hierdie tipe teleskope bitter min onder 12x-vergroting gebruik word.
Die Razor AMG is beslis ’n toepaslike teleskoop vir langafstandskiet en ons huiwer nie om dit aan te beveel nie. Dis nie ’n goedkoop stukkie toerusting nie, maar kwaliteit kom altyd teen ’n prys. * Vortex-produkte word landwyd deur vuurwapenhande- laars verkoop, besoek gerus jou gunsteling-handelaar en vra hom uit oor Vortex.