Sig Sauer P320F
Die modulêre ontwerp van hierdie pistool maak dit veelsydig, aanpasbaar en betroubaar.
Met gewapende aanvalle op plase en in stede wat daagliks toeneem, ag heelparty mense dit belangrik om wapens vir selfbeskerming aan te koop. ’n Pistool is ’n goeie opsie want dis maklik hanteerbaar en kan oral saamgedra word.
L&O, die plaaslike verspreider van SigSauer-produkte, het onlangs vir ons ’n P320F-pistool (die F staan vir full size/ volgrootte) gegee om op die skietbaan te gaan toets. Hierdie pistool is in vier kalibers beskikbaar, naamlik 9mm Parabellum, .357 Sig, .40 S&W en .45 ACP. Dit is ook in vier verskillende groottes beskikbaar: die Full, Carry, Compact en Sub Compact. Die Full-pistool se loop is 4.7” lank (ongeveer 12cm) terwyl die ander drie variante lope het van 3.9”/9.9cm.
KOMPONENTE KAN VERANDER
Die Sig P320 is uniek in ’n paar opsigte. Die ontwerp is ’n sogenaamde modulêre een wat beteken dat die komponente van die pistool verander kan word om dit van ’n Full na ’n Compact, Sub Compact of ’n Carry te kan verander of selfs om die kaliber te verander deur bloot die lope en glystukke te ruil (dit geld net as jy van 9mm na .357 Sig of .40 S&W wil verander). Die .45 ACP is nie ruilbaar met die ander kalibers nie en is slegs as aparte pistool beskikbaar.
Behalwe dat die Sig P320 se
kaliber en looplengte verander kan word, kan jy ook die grootte van die pistoolgreep/raam verander om by die grootte van jou hand aan te pas. Die pistoolgrepe is in drie groottes beskikbaar naamlik groot, medium en klein en dis nie net die lengtes wat verskil nie, maar ook die omtrekke van die grepe. Die raam van die P320 is van ’n duursame polimeer gemaak terwyl die snellergroep/meganisme van staal is en maklik verwyder kan word. Soos te verwagte is die glystuk ( slide) ook van staal (vlekvrye staal) en dit het ’n duursame swart afwerking wat SigSauer, Nitron noem. Die magasyn, wat 17 patrone kan neem, is ook van staal.
SNELLER EN VEILIGHEID
Nog iets wat die SigSauer P320 onderskei van ander pistole is dat dit nie ’n konvensionele hamer het wat op ’n slagpen slaan om die skoot af te vuur nie. Die P320 gebruik ’n sogenaamde striker-fired meganisme. Dit beteken maar net dat die slagpen veerbelaai is en as die sneller getrek word, ontspan die veer en word die slagpen vorentoe gedryf om op die slagdop van die patroon te slaan. Mense verwys na hierdie tipe meganisme ook as ’n pretensioned double action striker. As jy die sneller trek, kom jy dadelik agter dis nie ’n enkel- aksie-trek nie, maar dit voel ook nie heeltemal soos ’n regte dubbelaksie-trek nie en die sneller is glad nie swaar om te trek nie. Die trekgewig van die sneller is ongeveer 5.5lb.
Die Sig P320-pistool het geen eksterne veiligheidsknip nie, maar maak staat op die outomatiese slagpen-veiligheidsmeganisme met ’n ontkoppelaar ( disconnector) om die pistool veilig te hou – die sneller moet dus fisies getrek word voordat die pistool sal vuur.
In 2017 is daar bevind dat die pistool wel per ongeluk mag vuur as dit laat val word en ’n baie harde oppervlak teen ’n sekere hoek tref. Daar is ’n groot ophef in die media daarvan gemaak, maar toetse het bewys dis eintlik baie moeilik om die pistool wel sover te kry om af te gaan as dit val. Die probleem is nagespoor – dis blykbaar die gewig van die sneller wat daarmee te doen het. Wanneer die pistool val, is die sneller se gewig verantwoordelik daarvoor dat dit as gevolg van inertia terugbeweeg en die pistool laat vuur. Deur slegs ’n ligter sneller te installeer, is die probleem opgelos. Sig-eienaars wat van die “ouer” pistole het, kan dit kosteloos opgradeer met die nuwe ligter sneller.
Sig se P320 gebruik die sogenaamde short recoil locked breech- ontwerp om die pistool na elke skoot te herlaai. Vereenvoudig gestel beteken dit maar net dat die loop, glystuk en sluitstuk, gesluit as ’n eenheid saam vir ’n baie kort entjie terugbeweeg (totdat die druk veilig genoeg is) voordat die glystuk ontsluit, alleen verder agtertoe beweeg en weer vorentoe om die volgende patroon uit die magasyn tot in die kamer te voer.
Die Sig P320F weeg 836g, is 203mm lank, 33mm breed en is 140mm hoog. Dit word verskaf met die gewone Patridge-tipe oop visiere met drie wit kolletjies – twee kolletjies op die visier en een op die korrel (sien foto). Jy sentreer bloot die korrel se kolletjie mooi tussen dié van die visier, plaas dit op die teiken en trek die sneller.
SKIETBAANTOETS
Ons het die Sig met SigSauer se ammunisie op die Premierskietbaan naby Cullinan gaan toets en 140 patrone deur die pistool gejaag. Ek het eers twee vyfskoot-groeperings op 20m geskiet en daarna die pistool gebruik soos dit veronderstel is om gebruik te word – snelvuur op afstande van vyf, sewe en 10 meter. Die dubbelaksie-sneller en striker- meganisme is nie heeltemal bedoel vir presisieskiet op langer afstande nie, maar kom beslis tot hul reg tydens snelvuuroefeninge op kortafstand. Dis maklik om teikens te tref terwyl die skut ’n hoë vuurtempo handhaaf.
Omdat ek so gewoond is aan my CZ SP01 Shadow se greep, het die Sig s’n aanvanklik ’n bietjie vreemd gevoel, maar ek het gou gewoond geraak daaraan en dit baie gemakliker gevind as byvoorbeeld die greep van ’n Glock-pistool (let wel dis ’n persoonlike voorkeur – sommige mense vind die Glock se greep uiters gemaklik).
Die pistool het 100% gefunksioneer en nooit ’n enkele storing gegee nie, maak nie saak hoe vinnig ons probeer skiet het nie. Die Sig-ammunisie, gelaai met 115gr FMJ-koeëls het ook goed gefunksioneer en die nodige akkuraatheid verskaf wat verwag word. Sig se aanspraak is dat die koeëls die loop verlaat teen 1 185vps. Ons het dit gemeet as 1 165vps, wat naby genoeg is.
Nadat ek die SigSauer P320pistool gehanteer en daarmee geskiet het, is ek oortuig dat dit baie goeie en betroubare diens sal verskaf. Dit het foutloos op die skietbaan gefunksioneer en ek is bereid om die P320 sterk aan te beveel vir enigiemand wat ’n hoë-kwaliteit vuurwapen benodig vir selfbeskerming. Vir diegene wat die Full-model te groot vind, onthou dat jy nog die kleiner, Compact-, Sub Compact- en Carry-modelle kry. * SigSauer-pistole is landwyd by wapenwinkels beskikbaar. Die pryse wissel van ongeveer R12 750 tot R16 000 afhangend van die model. Vir addisionele inligting kontak die verspreider, L&O, by 012-819-7800.