Overberg-tak verleen droogtehulp Fred Camphor
Geagte leser en lede van SA Jagters, ek gebruik doelbewus die geleentheid om deur middel van hierdie skrywe ’n beroep te doen op elkeen van ons lede en ook lede van die publiek om ’n klein bydrae te lewer om die lewe van mens en dier in die distrik Sutherland effens beter te probeer maak. Hierdie verhaal het wel reeds in die media blootstelling gekry, maar op dié manier wil ons die boodskap aan lesers van SA JAGTER/ HUNTER oordra.
MAAK ’N VERSKIL
Hierdie mooi storie het begin toe twee lede van die Overberg-tak van SA Jagters uit empatie ’n paar sakke mielies by
boereboere in die Sutherland-omgewing gaan aflaai het. Aangegryp deur die ellende van mens en dier het Frank Esterhuizen en Essie Esterhuyze besluit om hul mede-jagters vir skenkings te nader sodat hulle meer voer na hierdie streek kon stuur.
Sutherland is een van vele streke in die land waar daar rampdroogte heers, maar weens sy ligging ver weg van hoofroetes af, kry dit min hulp van ander droogtehulpprojekte. Vervoer is een van die groot struikelblokke om voorraad by hierdie streek uit te kry aangesien die roete nie net weg is van die hoofroetes nie, maar ook moeilik toeganklik is.
Frank en Essie se uitreikprojek vir die gemeenskap van Sutherland het die lede van SA Jagters in die Overberg-tak en ander inwoners in die Overberg aangespoor om geld en voer te skenk. Verskeie boere van die omgewing het voer beskikbaar gestel terwyl kontantskenkings ingestroom het om voer en ander noodsaaklike items aan te koop wat die mense van Sutherland broodnodig het. Skenkers kon geld direk in Kaap Agri se bankrekening deponeer om vir nog voer te betaal. Kaap Agri het self ook mildelik bygedra terwyl ander sakelui in die omgewing op verskeie tasbare maniere hulle kant gebring het.
“Nie een van ons kon dink dat droogtehulp so vinnig sou groei van twee bakkies na agt bakkievragte nie,” vertel Justus Harms, voorsitter van SA Jagters se Overberg-tak. “Toe ons sleepwaens nodig gehad het, het Jimmy’s Trailers van die Strand ingestem om vyf sleepwaens vir drie dae gratis te verskaf.”
Baie van die Overberg-boere wat begrip het vir die nood in die landbousektor, het sonder om te skroom, voer geskenk om die voertuie vol te pak. Die eerste konvooi het op 24 November 2017 om halfagt die oggend uit Villiersdorp vertrek en teen 12h00 was hulle in Sutherland. ’n Vrag van 15 ton voer is op die skouterrein aan Sutherland se droogtekomitee oorhandig, wat die voer onder die boere verdeel het.
Dit was nie die einde van die storie nie. Twee maande later, op 23 Februarie het dié spannetjie vrywilligers wéér so gemaak. Overberg-tak het sedert November 2017 reeds 480 ton droogtehulp na Sutherland geneem. Sommige van die plase het onlangs vir die eerste keer in vyf jaar reën gekry, maar dit gaan nog jare neem vir hierdie gebied om te herstel. Die mense kry baie swaar. Party dae is daar nie kos op hulle tafels nie. Daar is selfs gevalle van kinders wat nie skool toe gaan nie, doodgewoon omdat hulle ouers nie die geld kan bymekaarmaak om die skoolfooie te betaal nie.
TOTAAL VAN PROJEK
Na sewe konvooie se droogtehulp staan die Overberg-tak se Droogtehulp-projek tans op ’n waarde van R1.041 miljoen, wat naastenby soos volg saamgestel is: • 82 ton mielies ter waarde van
R287 000 • 333 ton strooibale ter waarde
van R293 000 • Kruideniersware van R47 000 • Die totale afstand afgelê deur die konvooie voertuie is 36 000km • Brandstofkoste van R164 000 • Kontantskenkings aangewend vir aankoop van voer, kruideniersware, brandstof, R250 000 Die vervoerkoste sluit net die direkte brandstofkoste in. Die gebruik van die bakkies, vragmotors en sleepwaens is nie hierby ingesluit nie en is deur individue en sakelui van die Overberg geskenk.
Die bestuur en lede van die Overberg-tak hoop dat ander takke van SA Jagters en hulle gemeenskappe hierdie voorbeeld sal volg en ook die hand sal uitsteek om droogtegeteisterde gebiede in ander dele van die land te help. (Daar is boere in die noorde van die Oos-Kaap wat hulle plase se sleutels by hulle buurman gaan aflaai het en weggery het.)
Overberg-tak se droogtehulp is met groot verligting en dank- baarheid ontvang. “Jy kon die dankbaarheid in hulle oë lees. Ons as jagters is ook bewaarders. Dít is waarvoor die Vereniging staan. Ek hoop dat die publiek sal besef dat ons nie net uit die natuur neem nie, maar dat ons teruggee.” Dit is Justus se woorde.
HOE KAN LEDE HELP?
Die droogtehulp-projek gaan voort. Overberg-tak wil nog meer voer bymekaar maak. Lewer asseblief ’n bydrae tot hierdie skitterende droogtehulpwerk wat gedoen word deur ’n handjievol vrywilligers.
Hier is ’n projek wat spontaan ontstaan het en waar die vrywilligers reeds die logistiek uitgewerk het en in plek het. Kom ons help om dit ’n nóg groter sukses te maak. Selfs ’n bydrae van so min as R10 kan ’n verskil maak aan een mens of dier se lewe.
Lesers en lede van SA Jagters, ondernemings en lede van die publiek wat ’n bydrae wil maak, kan met Justus in verbinding tree by 082-497-4230 of justus@ supremespares.co.za. Enigiemand wat skenkings wil maak aan SA Jagters se Overberg-tak se droogtefonds, kan geld in een van die volgende rekeninge deponeer: Aan: Kaap Agri ABSA-rekeningnommer: 380 000 350 Takkode: 632 005 FNB-rekeningnommer: 6210 818 5663 Takkode: 250 655 Gebruik 43308 as verwysing OF: Aan: SA Jagters Overberg-tak FNB-rekeningnommer: 6211 487 1016 Takkode: 200 312 DROOGTE as verwysing
Kom ons wys vir die wêreld dat jagters die eintlike bewaarders is en dat ons omgee vir mens en dier wat swaarkry. Baie dankie by voorbaat vir enige bydrae. Vriendelike groete Fred Camphor HUB: SA Jagters