Beskermengele vir oë en ore
Dis eers as ’n mens ouer word dat jy besef hoe belangrik dit is om jou ore teen harde klanke te beskerm. En eers as jy ’n ooggetuie was waar iemand se oog of beide oë deur vlieënde skrapnel of enige ander voorwerp beseer is, dat jy die belangrikheid van goeie oogbeskerming insien.
Ons het onlangs die geleentheid gehad om ’n stel Howard Leight Impact Sport-gehoorbeskermers asook Honeywell se beskermende brille te toets. Beide hierdie produkte word versprei deur HSE Solutions wat in Germiston geleë is.
Die Impact Sport-gehoorbeskermers (wat ook oorbeskermers genoem word) is van die elektroniese tipe wat met batterye werk. Dit word soos gewone oorbeskermers gedra en funksioneer ook so. Aktiveer jy egter die oorbeskermers se elektroniese funksie deur bloot ’n skakelaar te gebruik, versterk dit alle omringende normale klanke. Die volume is verstelbaar. Skielike harde klanke (soos dié van ’n geweerskoot) word egter gedoof, waarna die oorbeskermer weer in ’n breukdeel van ’n sekonde later die normale klanke deurlaat. Gehoorbeskermers met hierdie tipe funksie stel jou in staat om die bevele van baanoffisiere duidelik te hoor, maar dit demp die klank van geweerskote baie effektief. Hierdie tegnologie is niks nuuts nie, sulke oorbeskermers is al jare lank op die mark. Die Howard Leight van HSE is nou net nog ’n opsie, maar ’n baie goeie een, moet ons byvoeg.
Hierdie oorbeskermers werk met twee AAA-batterye wat weggesteek lê onder ’n maklik-verwyderbare plastiekdekseltjie. Om te verhoed dat die batterye oornag pap raak as jy die skakelaar aan vergeet, sluit die kragtoevoer outomaties af na ’n gebruik van vier ure. As jy dan nog wil aanhou om die oorbeskermer te gebruik, sit jy bloot die skakelaar af, wag vyf sekondes en skakel dit weer aan. Dan werk dit weer vir vier ure lank. Batteryleeftyd volgens die vervaardiger is ongeveer 350 ure.
Ons het die oorbeskermers tydens verskeie skietbaansessies gebruik, ook tydens skietkompetisies waar baie skote rondom ons afgevuur is en die Impact Sport-stel het uitstekende resultate gelewer. Dis gehoorbeskermers wat ons met die grootste vrymoedigheid aanbeveel. Soos met al hierdie tipe oorbeskermers moet die volume liefs nie tot maksimum gedraai word nie, want dan kry jy ’n taamlike gesuis in jou ore en die skuurgeluide wat jou klere en jou normale bewegings maak, word erg versterk. Ingesluit by die gehoorbeskermers is ook ’n jack wat by ’n sok in die Impact Sport ingeprop kan word sodat jy musiek kan luister sonder om ander mense te pla.
Impact Sport-gehoorbeskermers is beskikbaar in vier kleure: camo, swart, olyfgroen en geel. Pryse wissel van R1 371 tot R1 953.
VEILIGHEIDSBRILLE
Honeywell se A700-veiligheidsbrille wat basies 100% UV-beskerming bied, is wêreldwyd bekend en word oral gedra, van onder in myne, tot op sportvelde, boupersele en olieboormasjiene. Hierdie brille is lekker lig en sterk en is beskikbaar in vier kleure, naamlik deursigtig, blou, grys en geel. Laasgenoemde kleur is gewild onder sportmanne en veral skuts omdat dit so ’n helder beeld van die teiken gee, veral in swak lig.
Hierdie brille sit baie gemaklik op die gesig en die lense is lekker groot – dit vou aan die kante om die gesig wat beter beskerming bied teen enige vlieënde voorwerpe en sommer ook teen lastige wind. Ons het ’n hele paar stelle van die brille aan mense uitgedeel (nie net skuts nie, maar ook aan mense wat die bruin en blou brille as sonbrille gebruik het) en die terugvoer was baie positief. Hierdie brille is beslis aan te beveel.
Diegene wat vanjaar HuntEx besoek en produkte by die Honeywell-stalletjie in saal 5 koop (stalletjienommer 579) kry só ’n bril gratis.
SA JAGTER/HUNTER is van mening dat beide bogenoemde produkte uitstekende waarde vir geld bied en beveel dit met vrymoedigheid aan.