Rudolph VH 6-24x50
Koos Barnard
Die Rudolph-reeks van teleskope, verkykers en afstandmeters is die breinkind van plaaslike entrepreneur Dolph Baard. Hierdie produkte kom van Japan af, ’n land wat al vir baie jare bekend is vir die optiese produkte wat daar vervaardig word. Sommige van die bekendste produkte in die jagwêreld is afkomstig van die “Land van die opkomende son”.
SA JAGTER/HUNTER het ’n Rudolph 6-24x50 VH (Varmint/Hunter) met ’n T5-kruishaar ontvang om deur te kyk. Dis ’n kompakte teleskoop wat ’n bietjie korter is as die twee ander Japannese teleskope van 2.5-15x50 wat ek besit. Die swart afwerking is semi-glansend en die naam Rudolph verskyn op die oogstuk aan beide die linker- en regterkant.
Daar is ’n stelknop vir parallaks op die normale plek aan die linkerkant van die teleskoop en die stelknoppe vir hoogte en rigting het beide beskermende doppies wat opskroef. Verder is daar geen fieterjasies aan die teleskoop nie en daarvan hou ek. Parallaks kan gestel word vanaf 50m tot oneindig. Die VH word verskaf met ’n sonskerm ( sun shade) wat sowat 13cm lank is (sien foto).
Die T5-kruishaar is ene wat ’n swewende senterkolletjie het waarvan ek ook baie hou en dan is daar 14 addisionele afmikmerkies op die onderste vertikale been van die kruishaar. Hulle is so gespasieer dat die spasies ’n afstand van 1 MOA of 29mm op 100m verteenwoordig as die teleskoop op 20x-vergroting gestel is.
Soos by die meeste teleskope aangetref word, is die oogstuk se fokus van die vinnig-verstelbare tipe. Wat die stelknoppe betref verteenwoordig elke klikkie wat jy stel ’n skuif van 7.2mm op 100m of ’n kwartduim op 100 jaarts. Beide stelknoppe het ook ’n zero-indeks, met ander woorde jy kan, nadat jy die teleskoop ingestel het, die stelknop se indeks so posisioneer dat die nulmerk regoor ’n zero-merkie is. Dit word gedoen deur bloot die stelknop op te trek om dit te bevry van die ratjies, waarna die knop geroteer word tot op die verlange nulmerk – baie fabrikate se stelknoppe werk so.
Ek was aangenaam verras met die beeldhelderheid van die Rudolph – al die lense het veelvuldige deklae op wat beeldhelderheid bevorder. Die Rudolph sal jou beslis nie in die steek laat in enige ligtoestande waaronder ons in Suid-Afrika jag nie. Wat lenskwaliteit betref, gee ek dus die Rudolph hoë punte.
Die sigveld is nie heeltemal so groot soos sommige van die duur Europese teleskope s’n nie, maar dit vergelyk baie goed met dié van drie Amerikaanse teleskope wat ek tans besit.
Ek het die Rudolph op twee gewere getoets, ’n Sabatti Tactical in 6.5x47L en my .223 Savage. Ongelukkig kon ons nog nie met die teleskoop gaan jag nie, maar het dit wel tydens drie skietbaansessies getoets. Hierdie Suid-Afrikaanse Japannees het die toetse met vlieënde vaandels geslaag. Die teleskoop het baie mooi konstant en herhaalbaar gestel en ek het die T5-kruishaar baie verbruiksvriendelik gevind. Ek verkies deesdae ’n swewende kolletjie bo ’n normale kruishaar en die Rudolph se T5 pas dus so reg in my kraal.
Die feit dat die kruishaar se afmikmerkies in 1 MOA-spasies kalibreer op 20x-vergroting, vergemaklik jou taak as jy dit wil gebruik om afstand te skat tydens ghongskietkompetisies of jag. Ek verkies om afmikmerkies te gebruik vir ghongskiet eerder as om aan ’n teleskoop te stel en daarom geval die T5kruishaar my.
Na afloop van ons skietbaantoetse kan ek met eerlikheid sê dat die 6-24x50 Rudolph my goedkeuring wegdra. Dit is beslis ’n teleskoop wat ek bereid is om aan te beveel en wat meer is, die prys is ook reg. Rudolph is bekend vir hul mededingende pryse en die VH-teleskoop val in dieselfde kategorie.
Oorweeg gerus ook hierdie teleskoop as jy weer op soek is na ’n glasoog vir ’n nuwe roer. Ek dink die Rudolph verteenwoordig uitstekende waarde vir geld. Die model wat ons getoets het, verkoop teen so rondom R12 000 in die kleinhandel. * Indien jy meer inligting verlang oor Rudolph-produkte kontak gerus vir Dolph Baard by 082-447-4827.