Stevenson-Hamilton – verdwyn in die bos
Die kamoefleerklerereeks van Promark wat bemark word onder die naam Stevenson-Hamilton is al ’n goeie klompie jare aan Suid-Afrikaners bekend. Dis klere wat plaaslik gemaak word en die kamoefleerpatroon is een van die bestes vir veldtipes in Suidelike Afrika.
James Stevenson-Hamilton was die eerste veldwagter van die destydse Sabie-wildreservaat wat die voorloper van die Kruger Nasionale Park was. Dit was as gevolg van Stevenson-Hamilton se dryfkrag dat die Krugerwildtuin uiteindelik in 1926 gestig is. Promark eer hierdie beroemde veldwagter deur hul kamoefleerklere na hom te noem.
Die kamoefleerpatroon bestaan uit ’n mengsel van die kleure bruin en groen wat in ’n akasia-tipe patroon op die materiaal aangebring is. Slim versteek in die patroon is die vorms van 11 verskillende diere soos byvoorbeeld kameelperd, hiëna, olifantslurp, sebra en voëls op ’n tak.
Promark bemark hemde, broeke, baadjies, onderbaadjies, hoede, pette, leergordels, geweerbande, truie en selfs kouse. Jagters sal belangstel in die tipiese gevegs-tipe langbroeke met kantsakke en sakke op die bobeen. Hierdie broeke het ook ingeboude kamaste met rekke wat onder om jou voet pas om die kamaste in plek te hou.
Hemde is met beide kort en lang moue beskikbaar en daar is ook hemde van ripstop- materiaal as opsie. Promark se produkte is almal baie sterk en goed gemaak wat verseker dat dit lank sal hou.
My mening is dat Promark van die beste hoede bemark vir plaaslike jagters. Daar is gewone pette in kamoefleer- en oilskin- materiaal en ook verskeie hoede wat van leer gemaak is. Twee van die lekker hoede wat
ek onlangs getoets het, is die Ultimate, ’n wyerandhoed van seemsleer (suede), gemaak op die patroon van die Australiese Akubra. Dié is sommer ’n eersteklas hoed met ’n netjiese leerbandjie om die bolgedeelte. Dan is daar ook die Gary, nog ’n wyerandhoed wat van oilskinmateriaal gemaak is. Beide hierdie produkte is hoedens wat ek met groot vrymoedigheid aanbeveel. Promark maak natuurlik ook die Survivor, ’n leerhoed wat jy sommer kan opfrommel maar wat sy vorm behou. As jy iewers in reënerige weer jag of selfs net stap, is Promark se oilskin- hoede en -pet beslis aan te beveel. Die pet is ook verkrygbaar met ’n lekker lang nekflap, iets wat ek twee jaar gelede in reënerige weer in Duitsland baie handig sou gevind het.
Promark se kamoefleerreeks word van 100% katoenstof ge- maak en dis iets wat by baie byval vind. Die klere is nie glad en glyerig teen jou lyf nie en dit raas glad nie in die veld nie. Laasgenoemde is baie belangrik veral as jy in digte bos jag waar jy wild dikwels op kortafstand raakloop. In die somer is die katoenhemde ook lekker koel. Die hemde het borssakke wat met knope vasmaak – sommige mense verkies dit bo Velcro omdat jy ’n sak wat met ’n knoop toemaak sonder enige geraas kan oopmaak.
Ek gebruik Stevenson-Hamilton-klere al vir meer as 10 jaar en kan net met die grootste lof van hierdie produkte praat. Dis beslis een van my gunstelinge en ek beveel dit met groot vrymoedigheid aan. * Vir meer inligting oor die Stevenson-Hamilton-reeks, kontak gerus vir Promark by 012-5465035 of admin@promark.co.za