SA JAGTER/HUNTER-SKIETKOMPETISIE
Die SA JAGTER/HUNTER-tydskrif hou op 22 September 2018 ’n skietkompetisie op die Blue Gum Valley-skietbaan buite Pretoria. Maar ons gaan vir ’n slag op die meer konvensionele jaggewere konsentreer en die maksimum afstand sal 200m wees.
Lede van jagverenigings kla dikwels dat hulle nie aan skietkompetisies wil deelneem nie, omdat hulle nie met hul liggewig jaggewere kan kompeteer teen diegene wat spesiale kompetisiegewere besit nie. Sommige mense voel dat skietkompetisies deesdae ’n equipment race geword het.
Dis moeilik om die begrip jaggeweer te definieer en daarom het ons besluit om liewer die term ‘ligte stapgeweer’ te gebruik. Vir die skietkompetisie sal die volgende beperkings dus geld: 1. Die geweer moet ’n konven
sionele pistoolgreep hê, geen duimgatkolwe of GRS-tipe pistoolgrepe sal toegelaat word nie. 2. Die loop mag nie meer as 19mm by die tromp meet nie. 3. Gewig sal beperk word tot 5.8kg (teleskoop ingesluit). 4. Maksimum teleskoopvergroting sal 10x wees. 5. Minimum kaliber is enigeen wat ’n 6mm-koeël skiet. 6. Knaldempers word toegelaat, maar geen trompremme nie. 7. Geweerbande wat rondom die boarm vasmaak, word glad nie toegelaat nie. 8. Geen skiethandskoene of elmboogbeskermers nie. 9. Skuts voorsien hul eie skietstokke, maar met slegs ’n enkelondersteuning onder die geweer se voorlaai. Hierdie is slegs voorlopige reëlings en die reëls mag dalk effens verander. Ons sal julle in- gelig hou. Die totale aantal skote sal 25 wees. Ongelukkig sal daar geen inskietgeleentheid die oggend voor die kompetisie wees nie.
Lekker groot pryse word beplan, maar alle pryse sal op die basis van ’n gelukkige trekking uitgedeel word sodat almal, nie net die topskuts nie, ’n gelyke kans staan om iets te wen.
Ons mik vir ’n totaal van 80 deelnemers. Die inskrywingsgeld behoort na raming so rondom R250 te wees.
Dan wil ons ook op dieselfde dag ’n windbuks-skietkompetisie op hierdie baan hou vir kinders. Meer inligting oor dié kompetisie sal ook mettertyd deurgegee word.
Sodra al die beplanning voltooi is, sal ons julle die geleentheid gee om in te skryf. Alle inskrywings sal voor die tyd gedoen word, geen inskrywings word op die dag van die kompetisie aanvaar nie. Hou maar die tydskrif en ons Facebookblaaie dop vir meer inligting oor wanneer die inskrywings oopgestel gaan word.