VERBETER DIE HERLAAIPROSES MET DIE DP-4
FRANCO JOOSTE
Die DP-4 is ’n herlaaistaander of stasie wat vir enige herlaaifanatikus ’n aanwins sal wees. Ek het onlangs die vervaardiger, MetPrep in Johannesburg gaan besoek om ’n DP-4 te ontvang en te toets.
Ek moet erken ek het gewonder watter produk iemand die herlaaimark in Suid-Afrika kan bied wat nog nie deur die Amerikaners ontwerp is nie. Ek is egter gou verkeerd bewys. Die DP-4 is ’n handige eenmanherlaaistasie wat deur Richard Ford, ’n ingenieur, ontwerp is en wat selfs by gevorderde herlaaiers byval sal vind. Dit is in wese ’n staander met verskeie plekke waarop verskillende herlaai-apparate geplaas of vasgesit kan word.
TOERUSTING SKUIF NIE ROND NIE
Richard het aan my ’n reeds saamgestelde DP-4 gegee wat ek net aan ’n geskikte tafel kon vasbout. Die staander word verskaf in los stukke en moet aanmekaar gesit word. Hy het ook ’n skaaltjie en kruitdrupper ( trickler) verskaf omdat die staander doelgemaakte voetstukke het vir herlaaiprodukte. Ek moes net ’n kruitmeter (-gooier) byvoeg om die proses aan die gang te kry. Wat hierdie produk so goed maak, is dat jou kruitgooier, skaal, trickler en tregter binne maklike bereik is en nie kan rondskuif nie. Dit maak die herlaaiproses vinniger en makliker omdat jou tafel nie vol losstaande items is wat jy dalk per ongeluk kan skuif nie. (Soos die skaal wat kan beweeg en dan weer gekalibreer moet word.)
Wat die DP-4 nog meer effektief maak, is dat jy ’n voetstuk vir jou spesifieke fabrikaat skaal en trickler kan aanskaf wat sal verseker dat die toerusting wat bo-op die DP-4 gemonteer is, nie kan skuif nie. En omdat die DP-4 ’n staander is wat jy op ooghoogte kan stel, kan jy presies horisontaal in lyn met die skaal se nulpuntmerkie kyk en sal jy nie sommer ’n parallaksfout maak nie. Verder het ek ook gevind dat dit met dié toestel baie makliker is om te sien wanneer die skaalnaald op die korrekte plek is as met ander soortgelyke herlaaistasies.
Die DP-4 kan bestel word in ’n verskeidenheid konfigurasies en met bykomende voetstukkies vir bykans al die verskillende fabrikate skale en tricklers wat beskikbaar is. Jy kan dit dus aanpas volgens jou eie herlaaitoerusting.
WAARVAN EK HOU
Wanneer jy voor die DP-4-toestel gaan sit, is alles ooghoogte en die eerste ding wat jy sien, is die kruitgooier reg voor jou met die tregter links agter daarvan gemonteer. Agter die tregter en ’n bietjie hoër, is die skaal, regs van die kruitgooier is die skaal se weegpannetjie, asook die trickler. Ek het my leë doppe links onder die DP-4 neergesit. Aan die regterkant is my klaargelaaide ammunisie en in die middel, die koeëls. Heel links is die pers ( press). Deur dit só op te stel het my herlaaiproses sommer van die eerste patroon af baie maklik en vinnig verloop.
Die gemonteerde tregter werk baie goed. Jy neem die patroondop en druk dit in die tregter se bek, en daarna gooi jy die kruit in. Dit maak die proses veel makliker as om met ’n los tregter en dop te werk.
Die DP-4 word uit ’n sterk 3.5mm-staalplaat gebou – daarom is dit stabiel en rigied. Die rande is gelip om te verhoed dat daar enige skerp dele is wat jou kan krap of sny. Vier boute is nodig om die DP-4 aan ’n tafel vas te bout. Soos julle kan sien, neem dit baie minder spasie in beslag – ongeveer ’n kwart van wat jy gewoonlik nodig het. Die DP-4 is ’n kwaliteit-produk en teen R1 418.85 bied dit uitstekende waarde vir geld. * Vir meer inligting kontak Richard by 082-415-3840 of stuur ’n e-pos aan sales@dp4. co.za