SA JAGTER/HUNTER LAAT DIE SKOTE KLAP
MARISA BEETON
SA JAGTER/HUNTER het op 22 September hulle heel eerste Senterslag-jaggeweerskietkompetisie suksesvol by die Blue Gum Valleyskietbaan buite Pretoria gehou.
Hierdie kompetisie is gebore uit die idee om skuts die geleentheid te gee om met hul gewone jaggewere kompeterend teen mekaar deel te neem, in teenstelling met ander kompetisies waartydens die manne met die beste toerusting elke keer seëvier.
Byna 40 skuts het deelgeneem aan die kompetisie wat oor vyf bane gehou is. Die deelnemers se skietvaardighede is getoets op vier papierteikenbane waar die maksimum skietafstand 200m was en die minimum 40m. Daar was ook ’n ghongskietbaan van 150m. Die totale aantal skote wat skuts moes skiet, was 25.
Die deelnemers het in twee klasse deelgeneem: ’n Liggewigjaggeweerklas en die Opeklas. Die gewigsbeperking vir die lig- gewigklas was 5.8kg insluitend die geweer, knaldemper en teleskoop. Liggewiggewere moes konvensionele pistoolgrepe hê en geen duimgat- of GRS-tipe kolwe is toegelaat nie. In hierdie klas was die maksimum toelaatbare deursnee by die tromp 20mm.
Daar was geen gewigs-, loopof kolfbeperking in die Opeklas nie. In beide klasse was die minimum kaliber enige een wat ’n 6mm/.243”-koeël skiet en die maksimum enige .375 Magnum. Slegs konvensionele drabande sonder lusse is toegelaat. Skuts mag geen handskoene, elmboogbeskermers en skietmatte gebruik het nie. Trompremme is ook nie toegelaat nie, maar knaldempers wel.
Tweepote wat aan die geweer heg, was toegelaat, maar slegs liggewig Harris-tipes wat kan toevou. Vir die staanhouding (papierbaan en ghongbaan) kon die skuts lang skietstokke gebruik en kortes vir die sithouding. Die maksimum teleskoopvergroting vir beide klasse was 12x. Baanoffisiere het toegesien dat deelnemers voor die aanvang van ’n oefening hulle teleskope se vergrotings afdraai na 12x toe. Saam met hierdie kompetisie is ’n luggeweerskiet onder leiding van Bushill aangebied wat bekend gestaan het as die Bushill Air Arms Airgun Event. Hierdie windbuksskiet was oop vir beide juniors en seniors en is op afstande van 10 tot 40 meter geskiet. Verskeie Air Arms PCPgewere is beskikbaar gestel vir diegene wat nie luggewere besit nie, maar wou deelneem. Daar is na veldteikens en silhoeëtdiertjies van staal geskiet uit die siten staanhoudings.
SA JAGTER/HUNTER het 40 inskrywings ontvang vir die
senters lag geweer skiet, waarvan 37 op die dag deelgeneem het. Die langnaweek het beslis ’n invloed gehad, want baie mense het met vakansie gegaan. Nege van daardie skuts het in die Opeklas geskiet. Daar was ook 10 inskrywings vir die luggeweerskiet, maar heelwat van die ander skuts het ná die afloop van die senters lag geweer skiet ook nie-amptelik hulle vernuf met Bushill se luggewere getoets.
DIE KOMPETISIE BEGIN
Die manne en dames het douvoordag reeds begin aanmeld by Blue Gum Valley waar hulle deur lede van die SA JAGTER/ HUNTER-span verwelkom is. Hulle het geregistreer en elkeen het ’n gelukspakkie ( goodie bag) met geskenkies ontvang wat deur SA JAGTER/HUNTER en Zeiss geborg is. Vir ’n paar skuts het die dag sommer op ’n goeie noot begin toe hulle as deel van ’n gelukstrekking, pryse soos byvoorbeeld ’n mes of teleskoopmonteerringe in hulle pakkies ontvang het.
Toe is die deelnemers se gewere gemeet en geweeg om vas te stel of dit aan die vereistes van die kompetisie voldoen. Daarna is die inligtingsessie onder leiding van SA JAGTER/HUNTER se redakteur, Koos Barnard (wat ook die hoofbaanoffisier vir die dag was) gehou.
Na afloop van die inligtingsessie het die manne in hul onderskeie aflossings na die bane beweeg. Dit was ’n warm dag met slegs ’n ligte windjie wat so nou en dan effens sterker gestoot het. Die wind het gelukkig nooit regtig gepla nie.
Baan 1 was die ghongskietbaan. Om dinge interessant te maak moes die deelnemers binne 35 sekondes drie skote na drie ghongs skiet. Diegene wat al drie die ghongs getref het, mag ’n vierde bonusskoot na nog ’n ghong geskiet het (steeds binne die toegelate 35 sekondes). Dié baan het vir opwinding gesorg, want dit was nie so maklik om die ghongs te tref nie. Joharika Scheepers het die manne gewys hoe en vier voltreffers met haar Howa 6.5 Grendel geskiet!
Vir die manne wat graag van voertuie af skiet, was daar ’n swartwildebees en jakkals (slegs laasgenoemde se kop) wat op Baan 2 aangedurf moes word. Daar is vanaf skiettafels geskiet met ’n los baksteen as voorste rus waarop jy jou hand moes laat rus. Drie skote moes na die wildebees se hart/longarea geskiet word, een skoot na sy brein en een skoot na die jakkalskop. Op Baan 3 moes skuts na ’n njala en ’n kwêvoël uit die staanhouding oor skietstokke skiet. Die kwêvoël is spesiaal daar geplaas vir almal wat in hulle lewe al graag die Bosveld se lastige kwêvoëls ’n les wou leer. Drie skote is na die njala se hart/longarea geskiet, een skoot na sy brein en ook een skoot na die kwêvoël.
Op Baan 4 het ’n rooibokteiken op 80 en 40m vir die deelnemers gewag. Behalwe vir die rooibokteiken moes daar ook na twee diamantvormige inskietteikens en ’n rooi “hart”geskiet word. Dertig sekondes is op elke afstand toegelaat vir drie skote, en skuts kon self besluit na watter teikens hulle op watter afstand wou skiet – solank hulle net aan die einde van die oefening drie skote op die bokteiken en een skoot elk op die ander drie teikens gehad het. Sit- en staanhoudings is hier gebruik sonder enige kunsmatige ondersteuning.
Baan 5 was die sebrabaan
» waar deelnemers uit die sithouding oor skietstokke op 150m na ’n sebra en kwêvoël of Indiese spreeu moes skiet. Drie skote moes na die sebra se hart/longarea geskiet word, een skoot na sy brein en dan een skoot na óf die kwêvoël óf die spreeu. Die spreeu het 10 punte meer getel as die kwêvoël.
By elke oefening kon deelnemers met voltalle bonuspunte verwerf, so goeie skietwerk is beloon. Die strafpunte was egter hoog en beide kwes- en misskote is swaar gestraf (misskote maak die wild onnodig wild, ha-ha!). Dit was ’n uitdagende kompetisie en die manne het gebloei. Volgende jaar sal die moeilikheidsgraad ’n bietjie verlaag word om hoër tellings moontlik te maak.
Alhoewel dit ’n uitdagende kompetisie was, het die manne en twee dames wat deelgeneem het dit baie geniet. Hier is ’n paar van die opmerkings:
“Dit was baie lekker! Maak asseblief weer so.”
“Die kompetisie was baie professioneel gereël, ons het dit vreeslik baie geniet.”
“Baie geluk aan die SA JAG- TER/HUNTER-span, dit was ’n uitstekende kompetisie wat baie goed gereël is.”
“Julle reëlings was puik, hierdie is voorwaar ’n wenresep! Die lucky draw werk uitstekend, iedere een het ’n prys gekry.”
“Baie lekker skiet in ’n goeie gees. Pryse was tops.”
“Dit was die lekkerste skiet in ’n lang tyd en die baanoffisiere was baie goed.”
Na afloop van die kompetisie het deelnemers hulself om die braaivleisvure tuisgemaak met hul eet- en drinkgoed, gereed vir die prysuitdeling. Die drie topskuts in elke klas van die geweerkompetisie het ’n kontantprys en unieke medalje ontvang wat spesiaal vir dié kompetisie ontwerp en gemaak is. Bushill het op hulle beurt oor die R3 000 se windbuks-skietbenodigdhede aan die wenners van die luggeweerkompetisie gegee.
Die wenner in die Liggewigjaggeweerklas en ook die algehele wenner was Hercules Louw met ’n totaal van 665 uit 830; tweede was Henry Pienaar met 520 en derde Erna de Villiers met 465. Deon de Villiers het die Opeklas gewen met ’n totaal van
625. Tweede was Kobus Vorster met 615 en derde Marco Schoeman met 565.
Die Bushill Air Arms Airgun Event is deur Andries Lategan ge- wen, Deon de Villiers was tweede en Hercules Louw derde. Almal se telling was 160 uit 200 en daar is toe uitgetel na aanleiding van wie die meeste van die moei- liker teikens platgeskiet het.
Die res van die pryse is deur middel van gelukstrekkings bepaal. Daar was onder meer twee Zeiss-teleskope te wen (slegs vir persone wat in die liggewigklas deelgeneem het), asook ’n Swarovski-, Lynx- en ’n Rudolphteleskoop. Verder was daar drie Konus-afstandmeters van Bushill en ’n Vortex-afstandmeter van Whylo. Ander pryse het skietmatte, geweersakke en skoonmaaklappe deur Bushill ingesluit, asook ses pakke Balistixkoeëls deur Ballistix Bullets. Die L&O-groep het ’n Mausergeweertas geskenk, Formalito het vier Leupold-messe gegee. Daar was ook pette van Savuti Arms en Whylo en vlekvryestaal sosatiestokke ook van Whylo. In totaal was daar meer pryse as deelnemers en die gelukstrekking is ’n tweede keer begin. Almal wat in die Opeklas deelgeneem het, is toegewyde kompetisieskuts, terwyl ’n groot aantal mense wat vir die liggewigklas ingeskryf het, nie gereelde kompetisieskuts is nie.