KLOP DIE ROTTE
GERHARD H. VERDOORN
Die bruinrot word as een van die gevaarlikste indringerspesies op aarde beskou. Daar is geen kontinent waar die bruinrot homself nog nie gevestig het nie, terwyl sy kleinnefie, die huismuis, ook baie goed op kontinente en eilande ingeburger is. Dit is ondenkbaar dat jagkampe en slagkamers rotvry is en daarom moet ’n mens maar lig loop vir die kontaminasie van slagplekke en voedsel met rotmis en urine wat onder meer salmonella-bakterieë dra. Een inname van salmonella haal ’n jagter maklik uit die veld en vestig hom vir ’n paar dae op die “wit troon” met ernstige maagkrampe en kwaai diarree.
Sodra rot- of muisgif genoem word, frons baie mense, want almal weet dat uile moontlik sekondêre vergiftiging kan opdoen wanneer hulle knaagdiere vang wat van dié doders gevreet het. Uile, valke, muskeljaatkatte, muishonde en slange is waardevolle knaagdierjagters en deur hulle getalle te skaad met gevaarlike gif, gaan die rotinfestasie net vererger.
Wat benodig word in ’n jagkamp en by slaggeriewe is ’n knaagdierdoder wat effektief is teen rotte en muise, maar wat nie sekondêre vergiftiging van uile, roofvoëls en roofdiere sal veroorsaak nie. Dit moet ook ’n lae risiko vir primêre vergiftiging inhou. Sommige knaagdierdoders is geskik om te gebruik in ’n omgewing waar daar uile is, maar dan is dit nie só effektief teen muise nie.
Selontra van BASF (L10101, Wet No. 36 van 1947, bevat 0.75g/ kg cholekalsiferol VERSIGTIG) is ’n nuwe knaagdierdoder wat feitlik geen risiko vir uile inhou nie. Dit is ook ’n uitstekende muisdoder met die verdere voordeel dat dit die knaagdier se eetlus na een dag demp; met ander woorde die muis knaag nie verder aan hout en toerusting nie en jy ly dus nie nóg skade nie. Alhoewel die aktiewe bestanddeel, wat Vitamien D3 is, wel giftig is vir roofdiere, is dit baie minder giftig vir hulle as die tipiese antikoagulant-knaagdierdoders.
Die belangrikste aspek van enige beheerprogram vir knaagdiere is om die risiko vir die omgewing te verminder. Dus is lokaashouers die beste manier om Selontra toe te dien sodat slegs pesdiere dit vreet. In jagkampe is dit ook noodsaaklik om die lokaas binnenshuis te gebruik sodat skadelose, inheemse knaagdiertjies nie daaraan blootgestel word nie. Maak seker die doder word aangevul sodat die hele bruinrot- of huismuiskolonie uitgewis word. Indien dooie rotte of muise opgemerk word, tel op en vernietig.
Geniet die rot- en muisvrye omgewing!