GALLERY SPORTING RIFLESKIETKOMPETISIE 2018
ANDRÉ VAN DER MERWE
Die eerste SAJWV Gallery Sporting Rifle-skietkompetisie is op Saterdag, 13 Oktober aangebied deur die Riemlandtak op die Riemland-skietbaan ongeveer 25km vanaf Bethlehem op die R26 na Reitz.
Op die Vrydag was daar geleentheid vir skuts om op dié skietbaan in te skiet in goed georganiseerde aflossings onder toesig van baanoffisiere. Inskietteikens en die diereteikens wat tydens die kompetisie gebruik is, is voorsien. Op 100, 200 en 300 meter kon die skuts na hartelus inskiet en oefen.
Saterdagoggend was dit vroeg duidelik dat die weer ’n potensiële probleem sou inhou aangesien daar reën voorspel is. Reeds tydens die inskietsessie was dit bewolk, winderig en koud. Die verwelkoming- en inligtingsessie was nog aan die gang toe dit begin reën en die eerste aflossing se skuts wat op die skietbaan begin aantree het, moes terugkeer klubhuis toe. Teen tienuur het die organiseerders begin bekommerd raak oor die nat teikens omdat die papier kon disintegreer. Dit sou die einde van die dag beteken. Teen 10:30 het Basie Bergh, die hoofbaanoffisier, die skuts nader geroep en die eerste aflossing het aangetree terwyl dit lig gereën het – die temperatuur was 11.5 °C.
Die Riemland-skietbaan het ’n pragtige klubhuis en die skuts en ander gaste het regdeur die dag heerlik gekuier. Wanneer die skuts van die skietpunt af gekom het, was hulle nat en koud en die skuiling van die klubhuis en warm koffie was dan baie welkom.
Die skietbaan het ’n unieke stelsel vir die wisseling van teikens wat bestaan uit klein, plat waentjies wat elkeen vyf teikenrame op het. Dié waentjies is gedurende die dag in twee groepe van vier agter een bakkie en vyf waentjies agter