GEORGE-BRANDE
Uit George skryf Gerhan Archer, die voorsitter van die Tuinroete-tak:
Laat my toe om met hierdie skrywe my opregte dank te betoon aan lede van my tak en die Vereniging en ook te vertel van ons tak se gebeurlikheidsplan.
Tydens die brande in George aan die begin van November 2018 het ek as voorsitter my lede gevra om donasies te maak in die vorm van kontantbydraes en vleis, (ons is tog jagters met almal ’n bietjie ekstra vleis in die vrieskas). Ons tak in samewerking met George Super Kitchen het warm etes aan die brandbestryders en brandslagoffers voorsien. Ons het deur middel van donasies 350 brandbestryders vir meer as ’n week van warm maaltye voorsien, soms tot drie maaltye per dag. Verder is daar warm maaltye bedien aan al die lede van die gemeenskap wat hulle huise in die brande verloor het.
NOODVOORRAAD Ons het ook ’n strategiese plan in plek geplaas; die eerste 48 uur na enige noodgebeurtenis is altyd krities en daarom beplan George Super Kitchen om te alle tye 400 gaar, bevrore etes in hulle vrieskamer te hou. Dit gaan hulle doen met die finansiele bydraes van die gemeenskap. Varsheid word verseker deur etes elke drie maande te roteer met die 1 000 kinderetes wat George Super Kitchen daagliks maak. Die voordele van sodanige noodvoorraad is voor die hand liggend – 400 warm etes kan binne twee tot drie ure gelewer word en skep ’n onmiddellike buffer om die volgende rondte kos te begin maak. Die noodvoorraad kan deur enige groep aangevra word en sal (met George Super Kitchen se diskresie) beskikbaar gestel word. Die organisasie hoop om mettertyd 1 000 gaar etes in noodvoorraad te hê en beskikbaar te kan stel.
Ons het binne drie dae R18 300 ingesamel en meer as 100kg vleis ontvang. Die kameraderie onder die lede van SA Jagters is ’n riem onder die hart. Ons kan saam jag, saam skiet maar ook saam staan as dinge rof raak. Baie dankie aan elkeen wat bygedra het.