Supersagte SOSATIES
Altyd gewild en mondwater-lekker.
SPRINGBOKSOSATIES
Springbokvleis is die witbroodjie van ons wildsvleissoorte. Oral waar jy kom, vertel mense dat springbokvleis hul geliefkoosde kook- of braaivleis is – nie net vanweë die feit dat die vleis werklik goed smaak nie, maar, so glo ek, omdat daar baie sentiment aan ons nasionale bok vasklou. Sommer gou sal die oom nostalgies vertel hoe sy oorle’ ma dié veldvleisie so wonderbaarlik kon gaarmaak. Ja, ai, die goeie ou dae...
Springbokke is gelukkig nog volop en bekostigbaar en dit dra ook by tot hierdie mooi bok se gewildheid onder jagters. Daarom is ons bevoorreg om redelik gereeld ’n springbokkarmenaadjie op die kole te gooi.
’n Ander deel van ons ryke erfenis, is die kosskatte wat saam met die Maleiers Kaap toe gekom het. Nie net kan ons spog met samoesas en bobotie nie, maar ons kan die lekkerte van sosaties deel met braaipêlle en kampkokke. Ons sosatieresep bevat ’n interessante marinade met ’n subtiele geur. Tydens ’n Noord-Kaap-kuier op die plaas Wildspan verlede jaar het ons dié sosaties oor die kole gebraai en glo my, dit was vreklekker. Omdat ’n vars pynappel nie beskikbaar was doer op die plaas nie, moes ’n blikkie pynappelringe die ding doen. Dit het regtig uitstekend gewerk saam met die vleisblokkies en soetrissie omdat dit sorg vir ’n heerlike, sappige happie.
1. Meng die bestanddele vir die marinade en gooi oor die vleisblokkies om oornag te marineer. 2. Bedek en laat in yskas. 3. Haal die volgende dag uit die yskas en besprinkel die vleisblokkies met sout en speserye van jou keuse. 4. Ryg die sosatieblokkies in die stokkies, begin en eindig met ’n vleisblokkie. 5. Ryg die bestanddele redelik styf in en gebruik die soetrissie, pynappel en ui afwisselend vir ’n mooi kleurvariasie. 6. Sit die ingerygde stokkies terug in die marinade, bedek en marineer vir nog ’n uur of twee in die yskas. 7. Draai die stokkies gereeld. 8. Braai oor matige kole en bedruip gereeld met die marinade tot gaar (ongeveer 10 minute, afhangend van hoe warm die kole is).