BESTAANSJAG WEER TOEGELAAT
Dit was met groot verligting dat Suid-Afrikaanse jagters op 5 Junie die goeie nuus ontvang het dat die jag vir vleis (oftewel bestaansjag) onder streng beheerde omstandighede weer toegelaat word onder vlak 3inperking. In terme van die regulasies wat deur die minister van omgewingsake, bosbou en visserye bekend gemaak is, kan jagters met behulp van die nodige permitte weer interprovinsiaal reis ten einde te kan jag om vleis vir hulle eie huishoudings te kan bekom.
Soos te verwagte het die inhoud van die regulasies bykans onmiddellik groot spekulasie by die publiek ontlok, en een van die vrae wat die meeste gevra is, is of ’n jagter sy vrou en kind mag saamneem op ’n jagtog in hierdie tye. Die antwoord hierop is ongelukkig nee, tensy die jagter se vrou en kind self jagters is, en oor jagpermitte van hulle eie beskik. Familienaweke en vakansies in die jagveld is dus nog nie ’n realiteit nie, maar sal hopelik weer ’n moontlikheid wees as die land na vlak 2-inperking geskuif word.
Ongelukkig het sommige jagters steeds gekies om die regulasies te verontagsaam en doodluiters hulle families saam met hulle geneem. In een geval is ’n bespreking vir vier jagters by ’n jagplaas gemaak, maar ’n totaal van 26 persone het opgedaag, insluitend vrouens en jong kinders! Sulke optrede is uiters onverantwoordelik en kan daartoe lei dat die toegewings wat gemaak is, teruggetrek word. Dit kan nie genoeg benadruk word dat dit nou, meer as ooit, belangrik is om by die regulasies te hou en jagters se beeld te beskerm nie.
Soos met alle nuus van hierdie aard, het dit baie werk agter die skerms geverg om die minister te oortuig om wel bestaansjag onder vlak 3-inperking toe te laat, en die Suid-Afrikaanse Jagters- en Wildbewaringsvereniging was, saam met ander rolspelers, aan die voorpunt van sake hier. Lizanne Nel (bestuurder: Bewaring) en Boetie Kirchner (bestuurder: Jagsake) het baie harde werk agter die skerms gedoen om jag nie net weer ’n moontlikheid te maak nie, maar ook om die lede ingelig te hou oor die stand van sake in samewerking met HAWASA (Hunting and Wildlife Associations of South Africa). Hiermee dan ’n hartlike dankie aan al die rolspelers wat jag weer ’n moontlikheid gemaak het!
Soos wat ons ook al gesien het in die laaste paar maande, kan die situasie op kort kennisgewing weer verander. So het daar op 14 Junie verskeie omsendskrywes op sosiale media die rondte gedoen wat aangedui het dat die regering oorweeg om die regulasies (wat op 5 Junie in die Staatskoerant gepubliseer is) te herroep en te vervang met strenger regulasies. Dit sou die toestande waaronder ons mag jag onder die bestaande regulasies, weer inperk. Soos te verwagte, het hierdie skrywes wye reaksie ontlok, en het verskeie humeure weereens opgevlam.
Die realiteit ten tye van publikasie hiervan is egter dat die regulasies soos uitgevaardig op 5 Junie steeds geldig is, en dat bestaansjag steeds wettig is met die korrekte permitte. Hierdie regulasies kan slegs herroep of vervang word deur middel van ’n kennisgewing wat in die Staatskoerant gepubliseer word. Tot tyd en wyl dit plaasgevind het, is bestaansjag dus wettig en versoek ons jagters om die regulasies te respekteer, die jag te geniet en veilig te wees