DIE EINDE VAN DIE BEGIN
Daar kan geen twyfel wees dat feitlik die hele SuidAfrika ’n groot sug van verligting gegee het toe pres. Cyril Ramaphosa op Sondag 16 Augustus aangekondig het dat die land na vlak 2 van inperking geskuif word. Nie net was tabak en vuurvog weer (wettig) beskikbaar nie, maar vir ons as jagters was die implikasie dat ons weer aan ons geliefkoosde tydverdryf kon deelneem. Veral vir wildboere was dit ook die teken dat hulle vir oulaas hierdie jagseisoen kon probeer opmaak vir die enorme verliese wat die Covid-19-pandemie in die jagbedryf teweeggebring het.
Ek self was baie verlig om die nuus dat ons na vlak 2-inperking geskuif word te hoor, en alhoewel daar bitter weinig van my eie jagplanne vir 2020 gekom het, het ek darem een keer die kans gehad om saam met goeie vriende om die kampvuur te sit en deur die kruisdraad te kon loer in die vroegmôre Karookoue. Vir hierdie geleentheid was en is ek baie dankbaar.
Met die Covid-mis wat stadig besig is om te lig, is dit nou belangrik om weer aandag te gee aan dinge wat ons so ietwat agterweë gelaat het die afgelope paar maande. Gedrukte media het ongelukkig nie ongeskonde uit die Covid-storm gekom nie, en soos baie ander tydskrifte moes ons hier by SA JAGTER/ HUNTER ook maar die gordel ’n bietjie stywer trek in hierdie ongewone tye. Die resultaat is dus dat ons mekaar slegs agt keer per jaar rondom die tydskrif se kampvuur sal ontmoet en nie meer elke maand nie. Ten einde op te maak vir die verminderde uitgawes sal daar egter meer inhoud in elke tydskrif verpak word, so daar sal steeds genoeg “vuurmaakhout” wees om die vuur aan die brand te hou tussen uitgawes.
Nuwe bloed is belangrik vir enige bedryf, en die kompetisie wat ons loods met hierdie uitgawe (blaai na bladsy 9 vir die besonderhede) vir jonger skrywers het nie net ten doel om nuwe talent te ontdek nie maar ook om die nodige passie te ontketen by diegene wat nog nie oormatige grys in hulle baarde het nie maar tog ook graag jag en hou van vuurwapens. Ek hoop van harte dat die skryfgogga sommer ’n hele klomp nuwe skrywers sal beetpak.
Alhoewel ons ’n keerpunt in die stryd teen Covid-19 bereik het, is dit nou meer as ooit belangrik dat ons steeds alles in ons vermoë moet doen om verantwoordelik op te tree en die gewraakte virus die finale nekslag toe te dien. Soos Winston Churchill na die veldslag van El-Alamein (wat die eerste groot bloedneus was vir die Duitsers in die Tweede Wêreldoorlog) gesê het: “It is not even the beginning of the end. But it is, perhaps, the end of the beginning”. Die virus en sy nagevolge gaan inderdaad nog vir lank met ons wees, maar die einde is in sig en daar is rede om positief te wees! Wees veilig!