Gebakte karamelappels

(bl. 67) Dis soos appeltert, kan jy byna sê. Die dun lagie karamel aan die buitekant word vasgevang tussen die krummels en smaak heerlik. Genoeg vir 6

6 groenappels 200 g (250 ml) suiker

60 ml water

140 g (250 ml) koekmeel

2 eiers, geklits

200 g gemmerkoekies, fyngemaal vanieljevla vir voorsit

Verhit oond tot 180 °C. Pak appels op bakplaat wat deeglik gespuit is met kleefwerende kossproei. Plaas suiker en water in middelslag-pot en bring tot kookpunt oor lae hitte. Roer tot suiker gesmelt het en verhoog hitte. Kook suiker tot goue karamel vorm. Gooi karamel versigtig oor appels en laat staan tot hard – sowat 5 minute. Breek karamel wat van appels afgeloop het los en gooi weg. Rol karamel-appels in koekmeel, dan in eier en laaste in gemmerkrummels. Herhaal proses nog een keer. Pak terug op bakplaat en bak 10-12 minute of tot krummelkors goudbruin is. Sit warm voor met vanieljevla.