Warm kekerertjie-enhoenderslaai
1 liter hoenderaftreksel 4 hoenderborsies 750 ml ongegeurde jogurt 30 ml tahini-pasta sap en gerasperde skil van 2 suurlemoene 2 knoffelhuisies, fyngekap 10 ml fyn komyn 10 ml witpeper 2 x 410 g-blikke kekerertjies, gedreineer ( chickpeas) sout en varsgemaalde swartpeper 80 ml witwyn-asyn 6 eiers 4 pitabrode, opgewarm 100 g okkerneute, grofgekap 30 ml gerookte paprika
(bl. 87) ’n Heerlik anderste manier om hoender voor te sit.
Genoeg vir 6
Bring aftreksel tot kookpunt en posjeer borsies 10-15 minute of tot gaar. Skep uit en vlok fyn met twee vurke. Plaas jogurt, tahini, sap en skil van suurlemoene, knoffel, komyn en witpeper in groot pot. Roer oor lae hitte tot mengsel warm is, net onder kookpunt – moenie kook nie, dit sal skif. Voeg kekerertjies by en hou aan roer oor lae hitte tot alles lekker warm is. Voeg hoender by. Geur goed met sout en peper. Hou eenkant. Bring nou pot met water tot kookpunt en voeg asyn by. Verlaag hitte tot stadige prut en breek eiers een-een in die pot. Posjeer 3-4 min vir sagte eiers of langer, nes jy verkies. Rooster pitabrode in broodrooster of warm oond. Skep eiers uit water bo-op warm kekerertjie mengsel. Sprinkel okkerneute en paprika oor. Breek pitabrode in kleiner stukke en sit voor saam met gereg. >