Die kersie op ...
… die spyskaart! Onthaal jou geliefdes en vriende met ’n spogmaal – elke gereg boordevol van die soet geure van verleidelike kersies. Gebruik dit vars, gedroog of bevrore. Volmaak vir ’n sagte, maar eksotiese lentekuier
Spyskaart
Rosé-en-kersie-sangria Kersie-en-pistasieneut-graanslaai Kersiebrood Alles-in-een-pot-feesvark Kersie-en-nougat-cassata
Kies só
Die kersie moet ferm voel en die vel moet ’n glansende voorkoms hê. Die kleur moet ’n diep wynrooi wees. Die stingel moet nog vas aan die vrug wees, groen en buigbaar.
Soorte
In Suid-Afrika plant ons net die soet kersie, maar wel verskillende kultivars daarvan. Die vrug kan in soet en sout disse gebruik word. Jy kan bv. vir Kersfees ’n varkrol glaseer met kersiesous of ’n kersietert maak vir poeding. Die suur kersie word hoofsaaklik vir kook gebruik. Jy kry dit meestal in gedroogde vorm in ons land. In SA is vars kersies van einde Oktober tot Desember in seisoen. >
Bêre só
Hou vars kersies in ’n lugdigte sluitsak ( ziplock) in die yskas. Moenie vooraf was nie – die skil is bedek met ’n waslagie wat dit langer vars hou. Spoel af net voor jy dit kook of eet.
Kersie-en-nougatcassata
Dit het soms op my grootword-tafel op Upington opgeduik, maar dan was ons baie grênd. Ek het eers jare later agtergekom my ma het dit van winkelroomys gemaak!
genoeg vir 8 2 liter goeiegehalte-vanieljeroomys 190 g geglasuurde kersies ( glaze) 40 ml amaretto-likeur (amandel) gerasperde skil van 1 suurlemoen 200 g pistasieneute, grofgekap 100 g nougat, grofgesny kakao vir oorsif vars kersies en roosstroop vir voorsit Roer roomys met houtlepel tot sag in groot mengbak. Meng res van bestanddele by. Skep mengsel in koekpan (volume 3 liter) en smeer gelyk bo. Laat roomys oornag in vrieskas. Haal uit en doop pan vinnig in kookwater. Keer uit op bord. Sif kakao oor. Sit voor met ekstra vars kersies en roosstroop. >