Geurige varkvleis, min tyd

As jy haastig ’n maal aanmekaar moet slaan, is varkvleis jou beste maat. Met min moeite en slim metodes kan jy geurige geregte optower wat almal sal beïndruk!

Lemoen-kassler-varktjops

Kersfees is gerookte ham ( gammon) my hoogtepunt, maar jy hoef nie tot dan te wag nie. As jy lus kry vir daardie hamgeur, maak hierdie resep. Dit proe byna soos Kersfees! genoeg vir 4

Verhit oond tot 180 °C. Verhit oondvaste braaipan oor hoë hitte tot warm. Voeg 20 ml olyfolie by en braai 6-8 groot kassler-tjops 1-2 minute per kant of tot goudbruin. Meng 350 ml suiwer lemoensap (nie nektar nie), 45 ml heuning en 30 ml korrelmosterd saam. Gooi oor tjops in warm pan. Bring tot kookpunt en plaas pan in warm oond. Oondbraai 10-15 minute oop of tot lekker taai glasuursel vorm en vark mooi blink. Verwyder uit oond. Sprinkel vars kruisement of koljander oor en sit voor met groente soos blomkoolpuree, gestoomde groen groente of roerbraaigroente, of komkommerslaai.