6 interessante boetiek-rums in die plaaslike bedryf

TIME ANCHOR RUM word in die hartjie van Johannesburg gedistilleer deur Warrick Brown en Shanna-Rae Wilby. Hul unieke manier van rum maak sorg vir Time Anchor se kenmerkende klapper-envanieljesmaak, wat dit nommerpas maak vir somerdrankies. Besoek www. timeanchor.co.za.

WHISTLER DARK RUM is Vrystaats van oorsprong, waar dit gedistilleer, verouder en gebottel word. As jy meer daaroor oplees, sal jy gou agterkom die mense wat dit maak, glo jy moet die gehalte en geure van die produk geniet: smake van sjokolade, toffie en neute. Besoek whistlerrum.co.za.

COPELAND RUM word in klein hoeveelhede in die Kaap gedistilleer deur James Copeland. Hy gebruik melasse en giskulture wat die rum ’n baie soet geur en tropiese smake gee. Elke bottel word met die hand verpak om seker te maak dit bly uniek. Besoek www.copelandrum.com vir meer.

INVERROCHE RUM word sewe jaar verouder en die eindproduk het ’n diep donker kleur en ’n heerlike smaak. Die drank word drie keer uit Afrika-melasse gedistilleer voor die veroudering in eikehoutvate begin. Mense wat al Inverroche se bekende jenewer gedrink het, moet die rum ook probeer. Besoek www.inverroche.com.

AGUA ZULU CACHAÇA van Distillery 031 is SuidAfrika se eerste rum wat in die Brasiliaanse styl gemaak word. Die meeste soorte rum word van melasse gedistilleer, maar vir cachaça word vars uitgedrukte suikerrietsap gebruik. Al die suikerriet vir die plaaslike rum kom uit KwaZulu-Natal. Die wit rum smaak op sy beste verkoel in drankies soos mojito. Besoek www. distillery031.com/cachaca.

DURBANVILLE RUM is een van die min plaaslike rums wat koud gedistilleer word uit melasse uit Afrika. Pa-en-seun-span Robert en Eugene Kleyn het hul onderneming begin met rum uit ’n ketel wat hulle self gebou het. Die koue distilleerproses sorg vir sagter geure, en natuurlike botaniese smake word by die wit rum gevoeg. Besoek www.durbanvilledistillery. com vir meer. >