Sjef Zola Nene & Herman se anderste bredies
Zola Nene, TV-sjef en kosstileerder, is gul, hartlik. Haar kurwes net so ruim soos haar lag. In haar frikkadelle proe jy al die heilsaamheid van die platteland. Herman Lensing, SARIE se kosredakteur, sê haar die stryd aan met sy basaar-kerrie, sóét
DIE UITDAGING Maak warm, huislike kos, troos teen die winterkoue BESTANDDELE Botterbone en maalvleis
’n Knypie van haar Zoeloe-kultuur. Skeutjie van die Indiër-kookkuns afkomstig van haar heimat, Durban. Twee jaar as sjef in ’n brasserie in Cheshire, Brittanje. Dís Zola Nene se kos in ’n neutedop. Zola, wat sewe jaar lank die vaste sjef op SABC3 se Expresso Morning Show was (tans is sy net as vryskut betrokke), maak vandag frikkadel-en-botterboon-bredie. Herman noem sy gereg basaar-kerrie, soet, “soos jy dit op die platteland maak. Afrikaanse mense sit mos suiker by als.” Aan Zola: “Jy sal sien as jy na ’n plattelandse troue toe gaan.” (As een van die “bashers” op M-Net se tweede seisoen van Wedding Bashers*, het sy ’n vry sê oor die kos by elke onthaal.)
ZOLA “Ek het die beste pampoenkoekies juis by ’n troue op Parys geëet.” Plat-op-die-grond-kos is hul albei se forte. Sy, terwyl sy bestanddele in ’n groen pot roer. (Blote toeval dat dit perfek pas by haar rok!) “Ek wil nie een van daai stuffy sjefs wees nie, te cool om regte kos te maak, kos waarmee almal kan identifiseer.” Sy het op George grootgeword, maar haar wortels lê in KwaZulu-Natal, waar sy gebore is. Die familieplaas by Amanzimtoti lê knus in haar kindertyd se herinneringe. Terwyl die vroue groot familie-etes berei het, moes die kinders uit die kombuis basta. Zola was nietemin altyd blinkoog dáár. Gô (afgelei van Gogo), ouma aan haar ma se kant, het haar die mieliebrood se mielies laat fynmaak. Herman kom van Upington, Noord-Kaap, ver-in-die-wêreld. Sy bekkige kosstaaltjies word dikwels voorafgegaan met: “My ma ...” HY Hoe beïnvloed jou kultuur jou kos? SY Ek kook graag met tradisionele Zoeloe-bestanddele soos suikerbone, mieliemeel, droë stampmielies. Ons eet baie bredies, ek gooi net meer kruie by as wat tradisioneel gedoen word. HY Baie bone? SY Mm ... bone, peule ... Daar is altyd blikkies in my koskas, dit gee bredies meer substansie.
HY My ma sit nooit bone by kos nie, net stampkoring by potjiekos. Wat kook jou ma graag vir julle?
SY Sy het in Durban by ’n buurvrou geleer om outentieke Indiese kerrie te maak. Kerrie, brijani. Ek het dit by haar geleer. Nie soet nageregte nie, dis nie deel van die Zoeloe-kultuur nie.
HY Meng jou ma ooit Indiër- en Zoeloe-kosse? SY: Sy maak albei, is ook lief vir stampmielies, hoenderpote. HY Sal jy dit eet? Hoenderpote? SY (rol haar oë) Dis mos wonderlik om aan ’n toonnael te kou! Dit word gewoonlik nie reg gaargemaak nie. As jy dit omdraai en jy kan nog die skurwe dele sien, weet jy dis nie reg gekook nie. HY: My oupa het ’n skaapkop in die grond gebak. Ek kon snags nie slaap nie, want ek sien daai ding onder die grond. Het julle groot familie-etes?
SY My ma kook vir die hele wêreld. En van alles wat ek maak, sê sy: “Ek het dit vir haar geleer.” Selfs al ken sy dit nie.
HY (wys na haar frikkadelle) Kyk net hoe perfek is hulle, almal ewe groot.
SY Ek’t dit nie gemeet nie, net met die oog gekorrel. Ek sit dit voor met pap, maar rys of brood is ook goed. HY Die geheim van goeie pap? SY Kook dit goed, anders laat dit jou opgeblaas voel. Minstens 45 minute oor lae hitte, jy eet dit met melk.
SY (wys na haar pot) Sien, als in een pot!
HY Min skottelgoed. Ek is allergies vir skottelgoed was en dieet. Kan ek jou balle proe?
SY As ek joune kan proe. Die frikkadel brand sy mond. Hy blaas hard, sjoe ... sjoe. Verklaar dan: Dit smaak na platteland, lekker, ek kan dit heeldag eet. SY (waarderend vir sý gereg) Heerlik. HY Dis presies wat ek wil hoor! *Kyk uit vir Zola in Wedding Bashers van Oktober op M-Net, kanaal 101, op DStv. Besoek www.zolanene.com. >