Swartbierbrood
BAK MET OORNAGGIS
(bl. 17) Die lekker van die brood is die beslag wat jy bo-oor die deeg smeer voor jy dit in die oond sit. Dit bak baie donker en gee ekstra smaak aan die brood.
genoeg vir 1 brood
GISMENGSEL – 24 UUR VOOR BAK 70 g (125 ml) koekmeel 125 ml water 1 x 10 g-sakkie kitsgis Meng alles en laat oornag in yskas fermenteer (minstens 8 uur).
BROOD 600 g (1 070 ml) koekmeel 120 g (210 ml) rogmeel 120 g (210 ml) volkoringmeel 1 x 10 g-sakkie kitsgis 10 g sout 440 ml donker bier 160 ml louwarm water 100 ml mielieblom ( maizena) 60 ml heuning 80 ml water Plaas oornag-gismengsel in bak van elektriese menger met deeghaak, plus al die meel (koek, rog en koring), gis en sout. Skakel menger aan op mediumspoed. Meng bier en water en gooi geleidelik by terwyl menger loop, tot sagte, kniebare deeg vorm. Verhoog spoed en knie 10-15 minute of tot deeg glad en elasties is. Plaas in skoon bak wat goed gesmeer is met olie – die bak moet 3 keer groter as die deegbal wees. Maak toe met kleefplastiek en laat op warm plek fermenteer tot dubbel die volume. Herhaal proses nog twee keer. Ná die derde rysproses, keer deeg uit op meelbestrooide werkvlak en verdeel in twee balle. Plaas elke bal op bakplaat wat goed gespuit is met kleefwerende kossproei en laat rys op warm plek tot dubbel die volume, sowat 20 minute. Terwyl deegballe rys, verhit oond tot 220 °C. Meng mielieblom, heuning en water. Skep lepels vol van dié beslag en sprinkel oor deeg. Bak 30-35 minute of tot donkerbruin kors vorm. Laat afkoel en sit voor.