Skuimpie-akkers
My ma het altyd vir ons skuimpies gemaak, die grênd woord meringue pas nie daarby nie!
genoeg vir 12
• 4 eierwitte • 320 g (380 ml) strooisuiker • 20 ml witasyn • 15 ml mielieblom • 300 g donkersjokolade, gesmelt • 12 klein ronde vanieljekoekies
Verhit oond tot 140 °C. Plaas eierwitte in skoon mengbak en klits by hoë spoed tot sagte punte vorm, sowat 2 – 3 minute. Terwyl menger aan is, gooi strooisuiker lepel vir lepel by. Hou aan klits vir nog 5 – 8 minute tot blink en styf. Voeg asyn en mielieblom by. Meng deur. Voer bakplaat uit met bakpapier en spuit goed met kleefwerende kossproei. Skep meringue in spuitsak met ’n skerprand-tuit van 1,5 cm. Spuit rosette van 2 cm in deursnee en sowat 2 cm hoog. Bak vir 45 – 50 minute of tot
buitekant bros en binnekant nog malvalekkeragtig is. Pak akkers op afkoelrakkie bo-op bakplaat en skep sjokolade oor tot heeltemal bedek. Laat stol. Plak met ekstra sjokolade op vanieljekoekies vas. Versier akkers met blaarkoekies (volg resep vir uilkoekies en maak blaarvorms).