5 minute met koekbak-duo
Die pragkoeke in dié uitgawe is die handewerk van Mari-Louis Guy en haar broer Callie Maritz van www.cakebread.co.za. Ons het gaan inloer
Wat is die topwenk as jy kinderpartytjiekoeke bak?
Trek jou kinderskoene aan en plaas jouself in die wêreld van jou haasbekkie of ampertiener. Vergeet dan al die reëls en geniet die voorreg om iets besonders vir jou kind te doen.
Wat mag jy nooit doen as jy so ’n koek bak nie?
’n Skeut rum ingooi nie! En ’n te groot koek bak nie – daar is iets ontsettend hartseer aan ’n onopgeëte gesnyde koek. Wees ook versigtig vir stokkies of te klein goetertjies wat nie eetbaar is nie. Nog ’n wenk: Moenie die koek alleen los met jou kinders voor die partytjie nie. Een van ons s’n het al ’n hap uit die hoek gevat en soldaatspeelgoed in die Frozen-koek gedruk!
Wat is tans die koekgier vir kinderpartytjies?
Voorheen was 3D-koeke (uitgesnyde gedoentes) in die mode, maar nou word lae koek op mekaar gestapel. Gaan gek en versier dit oordadig – met enigiets van druppels wat afloop, tot koekies, krummels, meringues of wat ook al.
Betowering word gevind in die wêrelde van Elon Musk en ons was nog nooit so baie met die
maan, sterre en komete gepla nie. Alles van ’n wêreld net buite ons bereik is gewild. Dink maar aan die eenhoring ( unicorn) se magiese krag wat bly bekoor, en reënboë wat oral te sien is.
Roomyskoeke is ook groot en wat ons op die oomblik vir ons kinders maak. Dit is reeds dae voor die tyd klaar en elke krieseltjie word geëet.
As ek niks kan bak nie, hoe kan ek steeds sorg vir ’n kinderpartytjiekoek?
Nog nooit was dit makliker om ’n verjaardagkoek op te tower nie. Met klaargemaakte sponskoeke en selfs reeds aangemaakte winkelversiersel het jy net nodig om dit kreatief te versier. Of nog makliker, maak ’n roomyskoek (soos op die voorblad)!
Botterversiersel of fondant?
As dit by smaak kom, wen botterversiersel elke keer. Ons versier ook eerder met gekoopte lekkertjies as fondantfiguurtjies.