Bitterlemoensjokoladetruffels
(bl. 9) Maak dié ryk truffels vooraf om om die kampvuur te geniet. genoeg vir 30 blokkies
• 50 g strooisuiker • 30 ml water • 200 ml varsuitgedrukte
lemoensap (so 3 lemoene) • 250 g goeie donkersjokolade,
fyngekap • 100 ml dik room • 10 ml ligte muscovado-suiker • knippie sout • 25 g fyngekapte versuikerde
lemoenskil • kakaopoeier vir oorsif
Voer ’n vierkantige bakpan van 17 x 17 cm met bakpapier uit. Verhit strooisuiker en 30 ml water in klein kastrol tot kookpunt. Laat kook tot dit ’n goue karamelkleur kry en draai en kantel die kastrol sodat dit eweredig bruin raak – hoogstens ’n paar minute. Haal van plaat af en voeg lemoensap versigtig by. Laat oor matige hitte kook tot mengsel met helfte verminder het en daar omtrent 100 ml stroop oor is. Haal van plaat af. Sit intussen sjokolade in bak. Verhit room en muscovadosuiker in klein kastrol tot dit net begin kook en suiker opgelos is. Gooi dié vuurwarm mengsel oor sjokolade, voeg knippie sout by en roer liggies tot sjokolade gesmelt is. Voeg warm karamellemoensous by en roer liggies om te meng. Voeg versuikerde lemoenskil by en roer liggies deur. Voer ’n bakplaat met bakpapier uit en spuit met kleefwerende kossproei. Giet mengsel in bakplaat en smeer bokant gelyk met paletmes. Laat afkoel voor jy bak bedek en vir minstens 2 uur in yskas sit tot ferm. Sit truffels voor deur ’n lagie kakao oor te sif en dan met warm kombuismes in blokkies te sny. Doop mes tussen elke sny in vuurwarm water en druk droog op kombuispapier – dit sal jou help sny.