Churros met warm kaneelsjokolade
(bl. 64) Anderste doughnuts wat lekker is om so staan-staan te eet. genoeg vir 6-8
• 250 ml water • 60 ml botter • 30 ml bruinsuiker • 140 g (250 ml) koekmeel • 3 eiers • 1 eiergeel • 5 ml vanieljegeursel • sonneblomolie vir diepbraai • 200 g strooisuiker • 30 ml fyn kaneel
WARM SJOKOLADE • 300 g donkersjokolade • 500 ml room • 20 ml fyn kaneel
Bring water, botter en suiker oor matige hitte tot kookpunt. Voeg koekmeel by en roer met houtlepel tot alles in een bal saamkom. Verwyder van hitte en voeg eiers en eiergeel een vir een by. Meng goed ná elke byvoeging. Voeg vanielje by en meng. Verhit sonneblomolie tot warm in ’n middelslagpot. Skep beslag in spuitsak met ’n 1 cmtuit. Spuit worse van so 5 cm in warm olie en braai tot goudbruin en bros, 5-8 minute. Meng strooisuiker en kaneel. Dreineer churros op kombuispapier en rol dadelik in kaneelsuiker.
Warm sjokolade: Plaas bestanddele in ’n middelslagpot. Roer oor lae hitte tot glad. Sit churros voor met warm sjokolade.