Strikdaskoekies
(bl. 49) Dit lyk na baie werk, maar dis doodmaklik.
genoeg vir 10
• 125 g botter • 100 g (125 ml) strooisuiker • 150 ml gouestroop • 5 ml vanieljegeursel • 1 ml sout • 300 g (535 ml) koekmeel plus
ekstra vir uitrol • 1 x 100 g-sakkie fyn amandels • 200 g (385 ml) versiersuiker, gesif • sap van 1 suurlemoen • rooi en blou voedselkleursel
Laai strikdaspatroon af op SARIE.com en druk uit op harde karton. Sny die das uit as templaat vir die koekies. Verhit oond tot 180 °C. Room botter, suiker, stroop en vanielje met elektriese menger in mengbak tot lig en romerig. Voeg sout, meel en amandels by. Meng tot ’n sagte koekiedeeg vorm. Draai toe in kleefplastiek en laat rus 25 minute in yskas. Strooi dun lagie meel op werkvlak. Rol deeg met koekroller uit tot 5 mm dik. Sny strikdasse uit deeg met templaat en skerp mes. Voer ’n bakplaat met bakpapier uit en spuit met kleefwerende kossproei. Plaas koekies op bakplaat. Bak 10-12 minute of tot goudbruin. Laat afkoel. Meng versiersuiker en suurlemoensap. Voeg net genoeg koue water by om ’n stywe, loperige pasta te maak. Verdeel in twee en kleur elke deel met voedselkleursel. Skep gekleurde mengsels in twee spuitsakke met 1 mm-tuit. Versier koekies soos op foto en laat staan 2 uur lank oop tot uitgedroog. Sit voor.
Wenk
Jy kan die koekies reeds 7 dae voor die partytjie maak. Hou in lugdigte houers.