Monster - makietie

Vir haar tweeling se vierde verjaardag het Claire Cummock kleurryke “monsters” ingespan om die 28 kleintjies te vermaak. Hulle het behoorlik gejil tussen die tafels vol kreatiewe eetgoed en ’n springkasteel

Een ding is seker, ’n monsterpartytjie sal nie sommer misluk nie. Dis prettig en gek, en daarby hou die meeste kinders én haar tweeling, Leah en Morgan, baie van monsters, sê Claire Cummock, ’n voltydse ma van Noordhoek, naby Kaapstad.

Haar beste vriendin, grafiese ontwerper Sally Cronjé, het gehelp.

“Ons het sowat ’n maand voor die groot dag uitnodigings uitgestuur. Die partytjie was op ’n Saterdag, om 2:30 die middag. En kan jy glo, onder die 28 maatjies was vyf stelle tweelinge!”

Claire het die meeste van haar idees op die sosiale visuele netwerk Pinterest gekry.

“Morgan is dol oor oranje en dit was ons hoofkleur.”

Die guitige tafeldoeke vir die partytjie het Claire self gemaak en die drielaagkoek, wat soos ’n vriendelike monster gelyk het, het sy gebak en met botterversiersel versier.

“Ek moes nogal lank vooraf beplan en oefen.”

Mini-monsterkolwyntjies en malvalekker-monsters, kompleet met ogies, het tot die feestelikheid bygedra.

Morgan was mal oor die monsterkoek en Leah was weer gek oor die ballonne en die springkasteel.

“Hulle het albei onbevange rondgehol weens ’n suiker-oordosis,” lag Claire.

Sy verwys na haar jaarlikse kinderpartytjie as ’n “liefdestaak” en begin reeds ’n jaar voor die tyd daaraan beplan.

En uiteindelik geniet sy dit byna meer as die kleingoed!

1. Dié kolwyntjies het Claire gekoop, die versiersuiker afgekrap en fondantgesiggies daarop gesit. Dit het soos ’n bom gewerk, want sy het baie ander bakwerk gehad en wou nie nog kolwyntjies ook bak nie. 2. Elke kind kon ’n gelukspakkie uitsnuffel tydens ’n skattejag en dit saamneem huis toe. Hulle moes met behulp van monsters op stokke (sien foto’s elders) hul pad vind in die tuin. In elke geskenkpakkie was speeldeeg in drie kleure, ’n pypskoonmaker, gekleurde vere, etikette, ’n verskeidenheid ogies en blinkertjies waarmee die maatjies hul eie monster kon maak. 3. Die kinders het water gedrink en ook monster- appel-, 2 mango- en lemoensap. Sally het al die etikette vir die sapbottels gemaak.4. Malvalekkers wat in versiersuiker gedoop is, is met Smarties en ander lekkers versier en op ’n stokkie gedruk … elke gesiggie met sy eie monsterpersoonlikheid.